मिचिएको भूमि फिर्ताका लागि सरकारलाई सधैं समर्थन : देउवा

काठमाडौँ । प्रमुख विपक्षी दल नेपाली कांग्रेसका सभापति शेरबहादुर देउवाले नयाँ नक्सा संविधानको अनुसूचिमा समेट्ने गरी संविधान संशोधन प्रस्तावमा सबै दलहरुले प्रदर्शन गरेको राष्ट्रिय एकताप्रति धन्यवाद व्यक्त गरेका छन् ।

उनले सबै पार्टीहरुले राष्ट्रिय एकता प्रदर्शन गरेकोमा धन्यवाद दिँदै अब मिचिएको भूमि फिर्ताका लागि पनि विपक्षी दलको हैसियतले सहयोग गर्ने प्रतिवद्धता जनाएका छन ।

‘सबै पार्टीहरुले राष्ट्रिय एकता प्रदर्शन गरेका छन् । यसबाट राष्ट्रिय हितका लागि, राष्ट्रको सार्वभौमसत्ता र मुलुकको अखण्डताका लागि एक छौँ भन्ने स्पष्ट भएको छ । सभामुख महोदयमार्फत म यहाँ उपस्थित सबै दलका साथिहरुलाई धन्यवाद दिन चाहन्छु।’, देउवाले भने ।

उनले लिम्यियाधुरा, कालापानी, लिपुकेलसहितको भूमि नेपालको रहेको कुरा अंग्रेजले छापेको नक्सामा पनि उल्लेख रहेको बताएका छन ।

ऐतिहासिक तथ्य र प्रमाणले पुष्टि गर्ने नेपाली भूभागहरु फिर्ता ल्याउनका लागि सरकारले गर्ने कूटनीतिक पहलमा कांग्रेसले साथ दिने देउवाले बताएका छन ।

‘भोलिको दिनमा हाम्रो भूमि कुटनीतिक पहल गरी फिर्ता ल्याउने कुरामा विपक्षी दलको हैसियतले पूरा पूरा सहयोग गर्ने प्रतिवद्धता जनाउँछु’, देउवाले भने, ‘छिट्टै संविधान संशोधन पारित होस् भन्ने चाहना छ, धेरै लामो बोल्न चाहन्न धन्यवाद ।’