शिक्षक दरबन्दी नभएपछि चार सामुदायिक विद्यालय गाभिए

काठमाडौं । सरकारी शिक्षकको दरबन्दी अभावका कारण सिन्धुपाल्चोकको पाँचपोखरी थाङपाल गाउँपालिकाको ४ वटा सामुदायिक विद्यालय गाभ्ने भएको छ । रैथाने मावि, चिलाउने मावि, सातकन्या र टालटुले आधारभुत प्राथमिक विद्यालय गाभेर एउटा नयाँ विद्यालय बनाइने भएको हो ।

चार वटै स्कुलमा मावि तहको सरकारी दरबन्दी नभएकाले निजी स्रोतबाट स्कुल चलाउनु परेकाले गाउँपालिकाले आर्थिक भार कम गर्न मर्जरको बाटो अपनाएको पाँचपोखरी थाङपाल गाउँपालिकाका अध्यक्ष टासी लामाले बताएका छन ।

अध्यक्ष लामा भन्छन्,‘हाल सञ्चालन भइरहेको विद्यालयहरुमा विद्यार्थी अभाव भएकाले मर्ज गरेका होइनौं । गाउँपालिकाको बजेट शिक्षकहरुलाई तलब दिँदै सकिने भएकाले विद्यालय मर्ज गरेर आर्थिक व्ययभार कम हुन्छ र गुणस्तरीय शिक्षा र नमुना विद्यालय बनाउन स्कुल पनि बनाउन सकिन्छ भनेर गाभेका हौं।’

हाल सञ्चालन भइरहेको विद्यालयहरुमा ८ सय जना भन्दा बढि विद्यार्थी अध्यरत छन् भने ६० बढी शिक्षक कार्यरत छन् । त्यसैले चार वटै स्कुल गाभिनुको कारण भने विद्यार्थी अभाव नभएको अध्यक्ष लामा बताउँछन् । गाभिएको बिद्यालयको नाम थाङ पाल भ्याली माध्यमिक बिद्यालय रहेको छ।