महाकाली सन्धीको निर्णय गम्भीर र ऐतिहासिक गल्ती प्रमाणित भएको बामदेव गौतमको दावी

काठमाण्डाैंः सत्तारुढ नेपाल कम्युनिस्ट पार्टी (नेकपा)का उपाध्यक्ष बामदेव गौतमले महाकाली सन्धीको पक्षमा विगतमा भएको निर्णय गम्भीर र ऐतिहासिक गल्ती प्रमाणित भएको बताएका छन् । उनले विगतको उक्त कदम गल्ती थियो भनी पार्टीले निर्णय गर्नुपर्ने माग गरेका छन् ।

बुधबार देखी जारी स्थायी कमिटिको तेश्रो दिनको बैठकमा बोल्दै उपाध्यक्ष गौतमले महाकाली सन्धी गर्दा मुहान लिम्पियाधुरा तय हुनुपर्छ अनिमात्र सन्धी गर्नुपर्छ भन्दा कारबाही गरिएको घटना स्मरण गराउँदै आत्मालोचना गर्न सन्धीका पक्षधरलाई आग्रह समेत गरे । ‘म लगायत १६ जना कमरेडहरुले महाकाली सन्धी गर्दा नदीको मुहान तय गर्नुपर्छ भन्दा कारबाही गरेर अन्याय गरिएको थियो,’ गौतमको भनाई उदृत गर्दै बैठकमा सहभागी एक नेताले भने, जो-जो सन्धीको पक्षधर थिए उनीहरुले पनि त्यसको समिक्षा गरी आत्मालोचना गर्नुपर्छ ।

गौतमले कडा रुपमा प्रस्तुत हुँदै इतिहासको घटनाको व्याख्या गरेका थिए । २५ वर्ष अघि भएको सन्धीको पक्षमा तत्कालिन नेकपा एमालेका नेता तथा हालका प्रधानमन्त्री केपी शर्मा ओलीले विशेष सक्रियता देखाएको बताएका थिए ।