जुम्लामा औद्योगिक प्रदर्शनी

जुम्ला, ८ असारः यहाँ उत्पादित राडीपाखीलगायतका सामग्रीको बजारीकरणमा सहयोग पुर्‍याउने उद्देश्यले आज दुईदिने औद्योगिक प्रदर्शनी सुरु गरिएको छ । प्रदर्शनीमा स्थानीय उत्पादन राखिएको उद्योग तथा उपभोक्ता हित संरक्षण कार्यालय जुम्लाका प्रमुख विनोद बानियाँले जानकारी दिनुभयो ।

स्थानीय कच्चा पदार्थ बनेका टोपी, झोला, स्याउका परिकार, ओखर, मह, मार्सी चामल, चिनो, कागुनो, कोदोको पिठोबाट बनेका परिकारलगायत प्रदर्शन गरिएको उहाँको भनाइ छ ।

सो अवसरमा जिल्ला समन्वय समितिका प्रमुख गौरीनन्द आचार्यले स्थानीय उत्पादनको गुणस्तरमा ध्यान जान जरुरी रहेको बताउनुभयो । यहाँ उत्पादित सामान विश्व बजारसम्म पुर्याउनका लागि प्रदेश, सङ्घीय र स्थानीय सरकारले भूमिका खेल्नुपर्ने उहाँले बताउनुभयो ।

औद्योगिक प्रदर्शनी मेलाले यहाँका उद्योगीलाई प्रोत्साहन र हौसाल मिलेको तातोपानी गाउँपालिकाका उद्यमी नारायण चौलागाईँले बताउनुभयो । जिल्लाका १८ जना उद्योगीले प्रदर्शनी प्रतियोगितामा भाग लिएको उद्योग तथा उपभोक्ता हित संरक्षण कार्यालयले जनाएको छ । रासस