राष्ट्रिय सभा उपाध्यक्ष घिमिरेको नेतृत्वमा संसदीय टोली चीन प्रस्थान

काठमाडौँः राष्ट्रिय सभाका उपाध्यक्ष बिमला घिमिरेको नेतृत्वमा एक संसदीय प्रतिनिधिमण्डल चीनको औपचारिक भ्रमणका लागि शनिबार प्रस्थान गरेको छ ।

चीनको युनान प्रान्तको कुन्मिङ सहरमा हुन लागेको ८ औं चीन–दक्षिण एसिया प्रदर्शनीमा सहभागी हुन ६ सदस्य रहेको संसदीय प्रतिनिधिमण्डल चीन प्रस्थान गरेको हो ।

उपाध्यक्ष घिमिरे नेतृत्वको प्रतिनिधिमण्डमा राष्ट्रिय सभा सदस्यहरू मायाप्रसाद शर्मा, तुलसाकुमारी दाहाल र दुर्गाकुमारी गुरुङ रहेका छन् । त्यस्तै, संघीय संसद् सचिवालयका उपसचिव विकास बोहरा र उपाध्यक्षका स्वकीय सचिव प्रेमबहादुर सिंह पनि प्रतिनिधिमण्डलमा रहेका छन् ।

उपाध्यक्ष नेतृत्वको संसदीय प्रतिनिधि मण्डलले जुलाई २३ मा हुने प्रर्दशनीको उद्घाटन समारोहमा भाग लिनेछ । प्रर्दशनीको उद्घाटन कार्यक्रममा उपाध्यक्ष घिमिरेले सम्बोधन गर्ने कार्यक्रम छ । भ्रमणका क्रममा प्रतिनिधिमण्डलले युनान प्रान्तका उच्च अधिकारीहरूसँग भेटघाट गर्ने कार्यक्रम रहेको बताइएको छ ।

उपाध्यक्ष घिमिरे नेतृत्वको संसदीय प्रतिनिधिमण्डल २५ जुलाई, २०२४ मा नेपाल फर्कने तालिका रहेको छ ।