कर्णालीका ४ सयभन्दा बढी उद्योग खारेज

काठमाण्डौः कर्णालीका ४ सयभन्दा बढी उद्योग खारेज भएका छन् । कर्णालीका १० जिल्लाका ४ सय १० वटा उद्योग खारेज भएको कर्णाली प्रदेशको उद्योग तथा उपभोक्ता संरक्षण निर्देशनालयले जनाएको हो । गत आर्थिक वर्षमा ४ सय १० वटा उद्योगहरू खारेज गरिएको थियो ।

आर्थिक वर्ष ०८०/०८१ मा दर्ता र नवीकरणको तुलनामा करिब एक चौथाइ हाराहारीमा उद्योग खारेज निर्देशनालयले जनाएको छ । कर्णाली प्रदेशको राजधानी रहेको सुर्खेतमा सबैभन्दा धेरै उद्योग खारेज भएका छन् । सुर्खेतका १ सय ६६, जुम्लाका ८१, कालीकोटका ३७, सल्यानका ३५, दैलेख र जाजरकोटका २८/२८, रुकुम पश्चिमका २२, हुम्लाका ७ र मुगुका ६ वटा उद्योग खारेज भएको निर्देशनालयको भनाइ छ । डोल्पामा भने उद्योग खारेज भएका छैनन् ।

खारेज हुनेमा धेरैजसो होटल, रेस्टुरेन्ट, कृषि फर्मजस्ता साना उद्योग रहेको निर्देशनालयका सूचना अधिकारी एवं प्रशासकीय अधिकृत थीरबहादुर श्रेष्ठले बताए । उद्योग खारेज नगरिएपछि अर्को उद्योग खोल्न नपाइने, धेरै जरिवानामा परिने भएकाले साना लगानीमा सञ्चालित उद्योग धमाधम खारेज गर्ने गरिएको उनको भनाइ छ । उद्योगीहरूले आर्थिक मन्दी, बजेट अभावले गर्दा उद्योग सञ्चालन गर्न नसकेको भन्दै खारेज गर्नुपरेको जवाफ दिने गरेको उनले बताए । कर्णालीमा ठूला उद्योग स्थापना तथा दर्ता भएका छैनन् । विद्युत्को समस्या, कच्चापदार्थको अभाव, महँगो जमीन र लगानीका कारण ठूला उद्योग स्थापना हुन कठिन छ ।

गत आर्थिक वर्षमा १ हजार ७ सय ९५ वटा उद्योग नयाँ दर्ता भएका छन् । २ हजार ५५ वटा उद्योग नवीकरण भएका छन् । सुर्खेतमा नयाँ ६ सय ७१ वटा र ९ सय २१ वटा नवीकरण भएका छन् । यस्तै जुम्लामा नयाँ २ सय ४ वटा र २ सय ३७ वटा नवीकरण भएका छन् । दैलेखमा १ सय ५६ नयाँ र १ सय ५६ वटा उद्योग नवीकरण भएका छन् ।

सल्यानमा नयाँ उद्योग १ सय ३२, २ सय ३६ नवीकरण, जाजरकोटमा नयाँ उद्योग १ सय ५३ र ८३ नवीकरण, रुकुम पश्चिममा नयाँ १ सय र ७४ वटा उद्योग नवीकरण भएको निर्देशनालयले जनाएको छ ।

मुगुमा नयाँ उद्योग दर्ता १ सय ११ र ५१ वटा नवीकरण, कालीकोटमा नयाँ उद्योग दर्ता १ सय २२ र १ सय ३१ वटा नवीकरण, डोल्पामा नयाँ उद्योग दर्ता ९३ र ७९ वटा नवीकरण, हुम्लामा नयाँ दर्ता ५३ र ८७ वटा उद्योग नवीकरण भएको निर्देशनालयको भनाइ छ । कर्णालीमा आर्थिक वर्ष ०७९/८० मा ३ हजार ८ सय ४० नयाँ उद्योग दर्ता भएका थिए । ३ हजार ५ सय ८३ वटा उद्योग भने नवीकरण भएका थिए । कान्तिपुर