फिफा विश्वकप एसिया छनोट खेलमा जापानको विजयी यात्रा कायमै

काठमाडौं । जापानले फिफा विश्वकप एसिया छनोटमा आफ्नो विजयी यात्रालाई तेस्रो खेलसम्म पनि कायम राखेको छ ।

जापानले बिहीबार घरेलु टोली साउदी अरेबियाविरुद्ध २-० को जित निकाल्यो ।

जितसँगै तीन खेलमा ९ अंक जोडेको जापान समूह ‘सी’ को शीर्षस्थानमा छ । पहिलो हार ब्यहोरेको साउदी अरेबिया समान खेलबाट चार अंकका साथ तेस्रो स्थानमा छ ।

किंग अब्दुल्लाह स्पोर्टस सिटी रंगशालामा जापानलाई जित दिलाउन डाइची कामाडा र कोकी ओग्वाले गोल गरे ।

खेलको १४औं मिनेटमा कामाडाको गोलमार्फत जापानले अग्रता लिएको थियो । ८१औं मिनेटमा ओग्वाले गोल गर्दै जापानलाई सहज जित दिलाए ।

छनोटअन्तर्गतकै अन्य खेलमा अस्ट्रेलियाले चीन तथा कतारले किर्गिस्तानलाई समान ३-१, दक्षिण कोरियाले जोर्डनलाई २-०, ओमानले कुवेतलाई ४-० र इराकले प्यालेस्टाइनलाई १-० ले पराजित गरे ।

यसैगरी बहराइन र इन्डोनेसिया २-२, संयुक्त अरब ईमिरेट्स (युएई) र उत्तर कोरिया १-१ तथा उज्वेकिस्तान र इरान गोलरहित बराबरीमा रोकिए ।