नेपालमा थप १३९ जना कोरोना संक्रमित थपिए, ६२६ जना निको भएर घर फर्किए

काठमाडौेः नेपालमा थप १ सय ३९ जनामा कोरोना भाइरस (कोभिड १९) संक्रमित पुष्टि भएको छ ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले देशभर १ सय ३९ जना कोरोना भाइरस संक्रमित भेटिएको जानकारी दिएका छन् । संक्रमितहरुको विभिन्न अस्पतालमा उपचार भइरहेको छ ।

मन्त्रालयका अनुसार दैलेखमा २८ जना, सप्तरीमा २१ जना र पर्सामा २० जनामा कोरोना देखिएको छ । यस्तै धनुषा र महोत्तरीमा १०/१० जना, बैतडी, काठमाण्डाै, ललितपुर र कास्कीमा तीन/तीन जना, सल्यानमा दुई जनामा सङ्क्रमण देखिएको छ । यस्तै सिरहा, काभ्रे, बाँके, रुपन्देही र सुर्खेतका एक/एक जनामा सङ्क्रमण देखिएको छ ।

यस्तै गएको २४ घण्टामा ६ सय २६ जना उपचारपछि निको भएका छन् । योसँगै अहिलेसम्म निको हुनेको सङ्ख्या १३ हजार ७ सय ५४ पुगेको छ । मुलुकभर ४ हजार ९ सय ५० जना सङ्क्रमित उपचार गराइरहेका छन् । यस्तै १६ हजार तीन सय ७१ जना विभिन्न क्वरेण्टीनमा बसिरहेका छन् ।