कोरोना संक्रमणबाट थप ४ जनाको मृत्यु, मृतकको संख्या ७९ पुग्यो

काठमाडौंः विश्व महामारीको रुपमा फैलिएको  कोरोना भाइरसको संक्रमणबाट नेपालमा  थप चार जनाको मृत्यु भएको छ ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता डा. जागेश्वर गौतमले दिएको जानकारी अनुसार काठमाडौंका दुई जना, बाँकेका एकजना र पर्साका एकजनाको कोरोना संक्रमणबाट मृत्यु भएको पुष्टि गरे ।

बाँके कोहलपुर नगरपालिका -२ बस्‍ने ७० वर्षीया महिलाको नेपालगन्ज मेडिकल कलेजमा उपचारका क्रममा साउन २५ गते ३ः१० बजे निधन भएको हो । उनी साउन २३ गते नेपालगन्ज कलेजमा भर्ना भएकी थिइन् । उनमा उच्च रक्तचापको समस्या थियो । त्यसैगरी पर्साको बेदियानी गाउँपालिका–१५ बस्‍ने ४५ वर्षीया महिलाको साउन २५ गते नारायणी कोभिड अस्थायी अस्पतालमा निधन भएको छ ।

काठमाडौं महानगरपालिका मध्य बानेश्वर बस्‍ने ७६ वर्षीय पुरुषको साउन २६ गते बिहान १०ः१५ बजे निधन भएको छ । उनको मेडिकेयर अस्पतालमा निधन भएको हो । काठमाडौंको कीर्तिपुर नगरपालिका ट्यांलाफाँट बस्ने ७७ वर्षीय पुरुषको साउन २६ गते निधन भएको छ । योसँगै नेपालमा हालसम्म कोरोनाबाट मृत्यु हुनेको संख्या ७९ पुगेको छ । यसअघि आइतबार कोरोना संक्रमणबाट थप दुई जनाको मृत्यु भएको पुष्टि भएको थियो ।

मन्त्रालयले नीजि, सामुदायिक, सरकारी र गैर सरकारी अस्पतालले २० प्रतिशत बेड कोभिड विरामीहरुको लागि छुट्याएर सम्बन्धित हब अस्पताललाई सूचना गर्न निर्देशन पनि दिएको छ।