गगन थापाको स्विस ट्रपिकल एण्ड पब्लिक हेल्थ इन्स्टिच्युट भ्रमण सम्पन्न

काठमाडौं, ३० वैशाख । संघीय सांसद तथा पूर्व स्वास्थ्य मन्त्री गगन कुमार थापाले स्विट्जरल्याण्डको अल्सविलस्थित Swiss Tropical and Public Health Institute (Swiss TPH) को दुईदिने भ्रमण सम्पन्न गरेका छन् । मे ६ र ७ तारिखका दिन गरिएको भ्रमणमा उनले अनुसन्धानकर्ता, विद्यार्थी र नीतिनिर्माताहरूसँग भेटघाट गर्दै सर्वव्यापी स्वास्थ्य सेवा र बालपोषणका विषयमा गहन छलफल गरेका थिए।

भ्रमणको क्रममा थापाले प्रोफेसर डा. गिन्थर फिंक, डा. जोर्डन वालेनबोर्न र कारमेन फिंकसँग विकासशील राष्ट्रहरूमा देखिने बालस्वास्थ्य समस्या, पोषण, र समावेशी स्वास्थ्य प्रणाली निर्माणका विषयमा छलफल गरेका थिए। उनीहरूले विशेष गरी दुईदेखि पाँच वर्षका बालबालिकाको पोषणमा ध्यान दिनुपर्ने आवश्यकता औंल्याए।

मे ७ मा आयोजित “Advancing Universal Health Care and International Partnerships Despite Uncertainties in Global Health: A Political Perspective from Nepal” शिर्षकको प्यानल छलफलमा गगन थापा वक्ताका रूपमा सहभागी भएका थिए। उनले स्वास्थ्य क्षेत्रमा दीर्घकालीन राजनीतिक संलग्नता आवश्यक रहेको बताउँदै राजनीतिक नेताहरूलाई नीतिगत छलफलबाट बहिष्कृत नगर्न आग्रह गरे।

थापाले शैक्षिक संस्थाहरूले राजनीतिक नेतृत्व, अनुसन्धानकर्ता र स्वास्थ्यकर्मीहरूबीच पुलको रूपमा काम गर्नुपर्ने बताए। कार्यक्रमका सहवक्तामध्ये स्वास्थ्य सल्लाहकार सुदीप पोखरेलले उत्तर–दक्षिण साझेदारीमा स्थानीय विशेषज्ञता र सांस्कृतिक समझदारीको महत्वमा जोड दिए।

स्विस टीपीएचको निमन्त्रणा र साझेदारीमा सम्पन्न यो भ्रमणले नेपाल र स्विट्जरल्याण्डबीच स्वास्थ्य अनुसन्धान र नीतिगत सहकार्यको ढोका खोल्ने अपेक्षा गरिएको छ।⁩