निफ्राको ‘हरित ऊर्जा ऋणपत्र’ आजदेखि कारोबारमा

काठमाडौँ, असार २६ । नेपाल इन्फ्रास्ट्रक्चर बैंक लिमिटेड (निफ्रा) ले जारी गरेको ‘निफ्रा हरित ऊर्जा ऋणपत्र ६%-२०८८/८९’ आजदेखि औपचारिक रूपमा दोस्रो बजारमा कारोबारका लागि खुला भएको छ।

निफ्राले ६ प्रतिशत ब्याजदरमा ७ वर्षे अवधिको ऋणपत्र जारी गरेको हो। प्रतिकित्ता एक हजार अंकित मूल्यका ५० लाख कित्ता ऋणपत्र नेपाल स्टक एक्सचेञ्ज (नेप्से) मा सूचीकृत गरिएको छ। यसरी सूचीकृत ऋणपत्रहरू आज (असार २५ गते) देखि सेकेन्डरी मार्केटमा खरिद–बिक्री गर्न सकिने भएको हो।

तर, सम्बन्धित ऋणपत्रधनीहरूले भने आफ्नो हितग्राही खातामा ऋणपत्र जम्मा भइसकेपछि मात्र यसको कारोबार गर्न सक्नेछन्।

निफ्राले नेपालमै पहिलोपटक हरित ऊर्जा सम्बन्धी ऋणपत्र जारी गर्ने अनुमति पाएको थियो। यो ऐतिहासिक ऋणपत्र जेठ १८ देखि २५ गतेसम्म निष्कासन गरिएकामा, जेठ २९ गते बाँडफाँट गरिएको थियो।

हरित परियोजनाहरूलाई प्राथमिकता दिई लगानी विस्तार गर्ने उद्देश्यले जारी गरिएको यो ऋणपत्रले पर्यावरणमैत्री विकासलाई प्रवर्द्धन गर्ने अपेक्षा गरिएको छ। निफ्राको यो पहललाई पूँजीबजारमा हरित लगानी प्रवर्द्धनतर्फको महत्वपूर्ण प्रयासको रूपमा हेरिएको छ।