नेकपा नेता कार्यकर्तालाई सामाजिक सञ्जालमा अंकुशः जथाभावी लेखे कारबाही

काठमाण्डाैंः नेकपाभित्रको अन्तरविरोध चर्किंदा गुटमा विभक्त नेता–कार्यकर्ताले अर्का गुटप्रति सामाजिक सञ्जालबाटै आक्रमण गर्ने प्रवृत्ति सामान्य बनेको छ । सत्तारूढ नेकपामा पछिल्लो पटक देखिएको विवादमा त कतिपयले सरकारी सञ्चारमाध्यमकै दुरूपयोग गरेर मन परेका नेताको देवत्वकरण र नपरेकाको राक्षसीकरण नै गर्न भ्याए ।

सञ्चारमाध्यम र सामाजिक सञ्जालबाट नेताको बदख्वाइँ गर्ने प्रवृत्ति बढेपछि नेकपाले त्यसमा अंकुश लगाउने तयारी गरेको छ ।

विष्णु पौडेलको संयोजकत्वमा गठित ६ सदस्यीय कार्यदलले आफ्नो सुझाव पेस गर्दै सामाजिक सञ्जालमा नेताविरुद्ध जथाभावी लेख्नेलाई कारबाही गर्न सिफारिस गरेको छ ।

कार्यदलले आफ्नो प्रतिवेदनको ४.७ मा दिएको सुझाव कार्यान्वयन भएमा नेकपाका नेता कार्यकर्ताले अब सामाजिक सञ्जाललाई हतियार बनाएर सहकर्मीमाथि आक्रमण गर्न पाउने छैनन् । जनप्रतिनिधि र पार्टी नेताको कार्यशैली र जीवनशैलीलाई मार्गदर्शन गर्न विगतमा बनाइएको आचारसंहितालाई परिमार्जन गरी कडाइका साथ लागू गर्न पनि कार्यदलले सुझाव दिएको छ ।

‘पार्टीमा विधि तथा पद्धति स्थापित गर्न, गुटबन्दी र अनुशासनहीनता अन्त्य गर्न तथा नेता कार्यकर्ता एवं जनप्रतिनिधिहरूको कार्यशैली र जीवनशैलीलाई मार्गदर्शन गर्न विगतमा बनाइएको आचारसंहितालाई परिमार्जन गरी कडाइका साथ लागू गर्नु पर्दछ,’ प्रतिवेदनमा भनिएको छ, ‘सबैले विशेषतः जिम्मेवार कमरेडहरूले पारदर्शी र जवाफदेही जीवनशैली अपनाउनु पर्दछु । र, सबैलाई आफ्नो आचरण र कामप्रति जवाफदेही बनाउनु पर्दछु ।’ साँघुबाट