कवाड व्यवसायीको ५ बुँदे माग, काठमाडौं महानगरविरुद्ध निर्णायक आन्दोलन घोषणा

काठमाडौं, ९ भदौ । कवाड व्यवसायी समाज नेपालले विभिन्न ५ बुँदे माग राख्दै आन्दोलन थालेका छन् । सोमबार रिपोर्टर्स क्लबमा पत्रकार सम्मेलन गर्दै व्यवसायीहरुले माग पूरा नभएसम्म आन्दोलन जारी राख्ने चेतावनी दिएका हुन् ।

उनहरुले संविधानले दिएको पेशा–व्यवसायको अधिकारको ग्यारेन्टी गर्नुपर्ने, काठमाडौं महानगरबाट भइरहेको कुटपिट, अपहरण, ज्यादती तथा संरचना भत्काउने कार्य तत्काल रोकिनुपर्ने र संलग्न महानगर प्रहरीलाई कानुनी कारबाही गर्नुपर्ने माग राखेका छन् । साथै व्यवसायी, संकलक तथा मजदुरको जिउधनको सुरक्षा सुनिश्चित गर्न सरकार हस्तक्षेप गर्नुपर्ने र विगत दुई वर्षमा महानगरले पुर्‍याएको क्षतिको क्षतिपूर्ति दिनुपर्ने मागसमेत उनीहरुको छ ।

पत्रकार सम्मेलनमा व्यवसायी ओमप्रकाश सिंहले अब आन्दोलनबाट पछि नहट्ने भन्दै मेयर बालेन साहलाई प्रत्यक्ष चुनौती दिए । संघर्ष समितिका संयोजक रामकेवल गुप्ताले मेयरले व्यवसायीलाई हटाउन १५ करोड रुपैयाँ टोकन मनी मागेको आरोपसमेत लगाए ।

यस्तै, व्यवसायीहरुले मेयर बालेन साह र महानगर प्रहरी प्रमुख राजु पाण्डेविरुद्ध कठोर भाषा प्रयोग गर्दै आफूहरुको पेशा–व्यवसाय र अस्तित्व नै समाप्त हुने अवस्थामा पुगेकाले निर्णायक संघर्ष गर्ने चेतावनी दिएका छन् ।