काठमाडौंमा सोमबारको सार्वजनिक बिदा खारेज, सबै कार्यालय बिहान १० बजेदेखि खुल्ने

काठमाडौं । जिल्ला प्रशासन कार्यालय काठमाडौंले आज (सोमबार) का लागि दिइएको सार्वजनिक बिदा खारेज गरेको छ । लगातारको वर्षाका कारण दुई दिनका लागि बन्द गरिएको कार्यालयहरू अब बिहान १० बजेदेखि सञ्चालनमा आउने भएका छन् ।

प्रशासनले आइतबार राति जारी गरेको सूचनामा मौसममा सुधार भएसँगै अब जोखिम टरेको भन्दै सबै सरकारी कार्यालय, संस्थान र स्थानीय तहहरूमा सेवा प्रवाह पुनः सुरु गर्न निर्देशन दिएको हो ।

सूचनामा भनिएको छ, “मौसममा सुधार भई जोखिमको अवस्था टरीसकेको हुँदा असोज २० गते सोमबार बिहान १० बजेबाट कार्यालय समयसम्म सबै प्रकारका सरकारी कार्यालय, संस्थान र स्थानीय तहहरूमा सेवा प्रवाह हुने गरी सञ्चालन गर्न अनुरोध गरिएको छ।”

यसअघि, लगातारको वर्षाले काठमाडौंका प्रवेशमार्गहरू अवरुद्ध हुँदा उद्धार र राहत कार्यमा सहजता ल्याउन असोज १९ र २० गतेका लागि सार्वजनिक बिदा घोषणा गरिएको थियो ।

तर, गृह मन्त्रालयले आइतबार साँझ विपद् जोखिम र प्रतिकार्य कार्यमा प्रत्यक्ष संलग्न नभएका जिल्लाहरूमा सार्वजनिक सेवा नियमित सञ्चालन गर्न निर्देशन दिएपछि काठमाडौं प्रशासनले सोमबारकै लागि बिदा खारेज गरेको हो ।

यससँगै काठमाडौंका सबै सरकारी कार्यालय, स्थानीय तह र सार्वजनिक संस्थानहरू आजदेखि नियमित रूपमा सञ्चालनमा आउने भएका छन् ।