प्याज निर्यातमा भारतीय प्रतिबन्धसँगै नेपाली व्यापारीको कालोबजारी शुरु- एकैदिन १०० रुपैया पुग्यो

काठमाण्डाैंः भारत सरकारले प्याज निर्यातमा प्रतिबन्ध लगाएपछि नेपाली बजारमा प्याजको मूल्य ह्वात्तै बढेको छ । व्यापारीले आफूखुशी मूल्य तोक्न थाल्दा प्याजको खुद्रा मूल्य १०० रुपैया पुगेको छ ।

भारतले प्रतिबन्ध लगाएपछि भदौ २९ गतेदेखि नै कालीमाटी फलफूल तथा तरकारी बजारमा प्याज आयात बन्द भएको छ । भारतले निर्यातमा प्रतिबन्ध लगाउनु केही दिनअघिदेखि नै नेपालमा प्याजको मूल्य बढ्दै गएको थियो ।

कालीमाटी फलफूल तथा तरकारी बजारको दैनिक मूल्यसूचीअनुसार गत १५ दिनमा प्याजको मूल्य करीब ८९ प्रतिशतले वृद्धि भएको देखिएको छ । भदौ १६ गते थोकमूल्य प्रतिकिलो ४२ रुपैयाँ पर्ने प्याज त्यसयता मूल्य बढेर प्रतिकिलो ७५ रुपैयाँ पुगिसकेको छ ।

भारतले निर्यात बन्द गरेपछि नेपालमा प्याज अभाव सृजना हुनुका साथै मूल्य झनै बढ्ने देखिएको छ ।

मंगलवार बिहान प्रतिकिलो ७० देखि ७५ रुपैयाँसम्ममा विक्री भइरहेको प्याज दिउँसो प्रतिकिलो १ सय रुपैयाँमा विक्री भएको छ । भारतले प्याज निर्यात बन्द गर्नुको वास्तविक कारण नखुले पनि अहिले त्यहाँ प्याजको सिजन नभएकाले मौज्दात सकिएको छ ।