सुन तोलामा ३ हजार १ सय र चाँदी ४० रुपैयाँले घट्यो

काठमाडौं। साताको पहिलो कारोबार दिन आइतबार (भदौ २१) नेपाली बजारमा सुन र चाँदीको मूल्यमा उल्लेख्य गिरावट आएको छ।

नेपाल सुनचाँदी व्यवसायी महासंघका अनुसार अघिल्लो कारोबार दिन शुक्रबारको तुलनामा छापावाल सुनको मूल्य तोलामा ३ हजार १०० रुपैयाँले घटेको हो।

मूल्य घटेसँगै आइतबार छापावाल सुन प्रतिटोला ३ लाख ४ हजार ३०० रुपैयाँमा कारोबार भइरहेको छ। यसअघि गत शुक्रबार तोलामा २ हजार ५०० रुपैयाँले बढेर छापावाल सुनको मूल्य ३ लाख ७ हजार ४०० रुपैयाँ पुगेको थियो।

यसैगरी, आइतबार चाँदीको मूल्यमा पनि गिरावट आएको छ। शुक्रबार प्रतिटोला ४ हजार ७६५ रुपैयाँमा कारोबार भएको चाँदी आइतबार ४० रुपैयाँले घटेर ४ हजार ७२५ रुपैयाँ कायम भएको महासंघले जनाएको छ।