नेपाल-चीन सम्बन्ध थप सुदृढ हुने राष्ट्रपति भण्डारीकाे विश्वास

काठमाडाैंः राष्ट्रपति विद्यादेवी भण्डारीले नेपालको सार्वभौमसत्ता, भौगोलिक अखण्डता र स्वतन्त्रताको सम्मान गर्दै आएकामा छिमेकी मित्रराष्ट्र चीनको सराहना गरेकी छिन्।

चीनका राज्य परिषद् सदस्य तथा रक्षामन्त्री वेई फेङ्हेसँग राष्ट्रपति कार्यालय शीतलनिवासमा भएको भेटमा राष्ट्रपतिले नेपाल र चीनबीच शदियौँदेखि रहिआएको प्रगाढ सम्बन्ध थप सुदृढ गर्न रक्षामन्त्रीको भ्रमण कोसेढुङ्‍गा हुने विश्वास व्यक्त गरिन् ।

राष्ट्रपति र चिनियाँ रक्षामन्त्रीबीच भएको भेटमा दुई देशबीच भएको विकास साझेदारीसम्बन्धी सम्झौताको कार्यान्वयनमा जोड दिइएको राष्ट्रपतिका सूचना तथा सञ्चारविज्ञ टीकाप्रसाद ढकालले जानकारी दिए ।

सो अवसरमा नेपाल सरकारका उच्चपदस्थ पदाधिकारी, नेपालका लागि चिनियाँ राजदूतसहित प्रतिनिधिमण्डलका सदस्यको पनि सहभागिता थियो।

त्यसअघि चिनियाँ रक्षामन्त्री वेईले प्रधानमन्त्री केपी शर्मा ओली र प्रधानसेनापति पूर्णचन्द्र थापासँगको भेट गरेका थिए । एक दिने नेपाल भ्रमणमा आएका उनी आईतबार साँझ  फर्किएका छन् ।