बन्दसत्रमा छिर्न नपाएपछि भीम आचार्य होटलको कोठाबाटै लाइभ

काठमाण्डौंः प्रदेश १ का पूर्व मुख्यमन्त्री तथा एमाले नेता भीमप्रसाद आचार्यलाई कोरोना संक्रमण पुष्टि भएको छ । पार्टीको महाधिवेशनमा भाग लिन चितवन पुगेका आचार्यलाई कोरोना संक्रमण भएपछि बन्दसत्रमा सहभागी हुन नपाएका हुन् ।

कोरोनाले समातेपछि अहिले उनी सौराहामा बन्दसत्र आयोजना भएको होटल सेभेन स्टारको आइसोलेसनमा छन् ।

पछिल्लो समय आचार्यले पार्टीभित्र ठूलै उत्तारचढाव ब्यहोरेका छन् । केन्द्रीय मन्त्री भइसकेका उनलाई मुख्यमन्त्री बनाउने शर्तमा २०७४ सालको निर्वाचनमा एमालेले प्रदेशचुनावमा उम्मेदवार बनाएको थियो । चुनाव जितेपछि पार्टीभित्रको दुईपक्षीय लडाईंको चेपुवामा परेका कारण उनी संसदीय दलको नेताबाट पराजित भएका थिए ।

आफूभन्दा निकै जुनियर सांसद शेरधन राईले दुई मतले पराजित गरेपछि मुख्यमन्त्री बन्ने उनको सपना त्यहिँ तुहिएको थियो । त्यसपछि खिन्न महशुस गरेका आचार्य प्रदेश संसदको बैठकमा पनि प्रायः सहभागी भएनन् ।

पार्टीभित्रको अन्तरसंघर्षमा तत्कालीन वरिष्ठ नेता माधवकुमार नेपाल समूहको तर्फबाट प्रदेश १ को नेतृत्व गरेका आचार्य १० बुँदेपछि ओली गुटमा फर्किएका हुन् । त्यसैका आधारमा उनी मुश्किलले दुई महिना मुख्यमन्त्री बने ।

अहिले पार्टीको महाधिवेशनमा अन्य नेताहरुले भटाभट उम्मेदवारी घोषणा गरिरहेका बेला आचार्यलाई भने होटलको कोठामा बसेर बन्दसत्रको लाइभ हेर्नुपर्ने अवस्था बनेको छ । उनी न उम्मेदवार बन्न सकेका छन्, न मतदान गर्ने मतदाता नै । जनआस्थाबाट