काँग्रेस धादिङको सभापतिमा पौडेल समुहका अधिकारी निर्वाचित

काठमाण्डौंः नेपाली काँग्रेस धादिङको १४ औँ जिल्ला अधिवेशनबाट सभापतिमा रामनाथ अधिकारी निर्वाचित भएका छन्। उनका प्रतिद्वन्द्वी भीमप्रसाद ढुंगानालाई ३६ मतले हराउँदै विजयी भएका हुन्। जिल्ला अधिवेशनका लागि भएको मतदानमा अधिकारीले १ हजार ८२ मत ल्याए भने ढुंगानाले एक हजार ४६ मत ल्याएका थिए। अधिकारी पौडेल निकटका हुन् भने ढुंगाना देउवा निकटका हुन्।

त्यस्तै उपसभापतिमा गेहेन्द्र मल्ल र दलबहादुर अधिकारी विजयी भएका छन्। मल्लले एक हजार ६८ मत ल्याए भने अधिकारीले एक हजार ६ मत ल्याए। सचिवमा विकास श्रेष्ठ र रामकृष्ण पाण्डे विजयी भएका छन्। श्रेष्ठले एक हजार एक सय २१ मत ल्याए भने पाण्डेले एक हजार १२ मत ल्याए।

सहसचिवमा नवराज तिमिल्सिनाले एक हजार ९१ मत ल्याएका छन् भने क्रान्ति डल्लाकोटी र विजयी पाख्रिनले नौ सय ९५ मत ल्याएका थिए। सहसचिव पदमा बराबरी मत आएपछि डल्लाकोटी र पाख्रिनले बराबरी मत बाड्ने सहमती गरेको छ। सहमती अनुसार पहिलो दुई वर्ष पाख्रिन सहसचिव हुनेछन् भने पछिल्लो दुई वर्ष डल्लाकोटी लाई पद हस्तान्तरण गर्ने बताइएको छ।

अधिकारी जिल्ला सभापतिमा निर्वाचित भएको यो पाँचौँ पटक हो। यसअघि २०५५ साल, २०५७ सालमा भएको पाटीको दशौँ अधिवेशन, २०६२ मा भएको एघारौँ अधिवेशन, २०६७ सालमा भएको बाह्रौँ अधिवेशनमा पनि सभापतिको उम्मेदवार बन्दै विजयी भएका थिए।