निर्वाचन आयोगको निर्देशन अस्वीकार गर्ने राप्रपाको निर्णय (विज्ञप्ती सहित)

काठमाडौंः निर्वाचन आयोगले विधानबाट ‘सनातन हिन्दु राष्ट्र एवं राजसंस्था सहितको प्रजातन्त्र’ हटाउन दिएको निर्देशनलाई राष्ट्रिय प्रजातन्त्र पार्टी (राप्रपा)ले नियतवश आफूहरुमाथि प्रहार गर्न खोजिएको भनी आपत्ति जनाएको छ ।

आयोगले राप्रपा विधान संंविधान अनुकूल बनाउन निर्देशन दिएपछि आइतवार बसेको राप्रपा केन्द्रीय पदाधिकारीको बैठकले राप्रपाले झण्डामा गाई राख्न नपाउने, विधानबाट राजसंस्था र हिन्दु राज्य पनि हटाउनुपर्ने आयोगको निर्देशन पूर्वाग्रही भएको निष्कर्ष निकालेको छ ।

अध्यक्ष राजेन्द्र लिङ्देनको अध्यक्षतामा बसेको बैठकले निर्वाचन आयोगबाट निर्देशन अस्वीकार्य हुने जनाएको छ । उसले यसबारे कानूनी र राजनीतिक उपचार खोज्ने पनि जनाएको छ ।

निर्वाचन आयोगले यही माघ २ गते पठाएको पत्रबारे आइतबार राप्रपाले बैठकबाट आधिकारिक धारणा सार्वजनिक गरेको हो ।

बैठकपछि राप्रपा महामन्त्री भुवन पाठकले जारी गर्नु भएको विज्ञप्तिमा यसअघि तीनै तहको निर्वाचनमा यही विधान अनुसार प्रतिस्पर्धा गरेर निर्वाचित भइसकेको अवस्थामा अहिले आएको आयोगको निर्देशन स्वीकार्न नसकिने स्पष्ट पारिएको छ ।