संसद अवरोधलाई निरन्तरता दिने एमाले संसदिय दलको निर्णय

काठमाडौंः प्रमुख प्रतिपक्षी नेकपा एमालेले संसदमा जारी अवरोधलाई निरन्तरता दिने निर्णय गरेको छ ।

नयाँ बानेश्वरस्थित संघीय संसद भवनमा सोमबार बसेको एमाले संसदीय दलको बैठकले संसदमा जारी अवरोधलाई निरन्तरता दिने निर्णय गरेको हो।

बैठकपछि एमालेका प्रमुख सचेतक विशाल भट्टराईले पार्टीले अघि सारेका मागहरु पूरा नभएसम्म संसदको अवरोध जारी राखिने जानकारी दिनुभयो ।

‘संसदको अवरोधका बारेमा हामी हाम्रा माग पूरा नभएसम्म यसलाई निरन्तरता दिन चाहन्छौं,’ उहाँले भन्नुभयो । यस्तै, एमालेले अमेरिकी सहायता परियोजना एमसीसीबारे ‘पर्ख र हेर’ को नीति अबलम्बन गर्ने भएको छ । संसदीय दलको बैठकले एमसीसीका बारेमा ‘पर्ख र हेर’ को नीति अबलम्बन गर्ने निष्कर्ष निकालेको छ।

प्रमुख सचेतक विशाल भट्टराईले सत्तारुढ गठबन्धनले समान धारणा नबनाउँदासम्म एमालले ‘पर्ख र हेर’ को नीति अबलम्बन गर्ने बताउनुभयो ।

‘जबसम्म उहाँहरु एउटै धारणाका साथ प्रस्तुत हुन सक्नुहुन्न तबसम्म नेकपा एमाले पर्ख र हेरको नीतिमा रहेको छ,’ बैठकपछि उहाँले भन्नुभयो । भट्टराईले समय आएपछि एमालेले एमसीसीका बारेमा आवश्यक निर्णय लिने पनि बताउनुभयो ।

उहाँले एमालेले न्यायाधीश र सभामुखमाथि महाअभियोग प्रस्ताव ल्याउने भनेर अनुमानको भरमा समाचार सम्प्रेषण गरिएको बताउनुभयो । यी विषयको सम्बन्धमा पार्टीको उच्च तहका नेताहरु बसेर यथोचित समयमा निर्णय लिइने पनि उहाँले जानकारी दिनुभयो ।