सुदूरपश्चिम प्रदेश सरकारको नीति तथा कार्यक्रम बहुमतले पारित

काठमाण्डौंः सुदूरपश्चिम प्रदेश सरकारको आर्थिक वर्ष २०८०/८१ को वार्षिक नीति तथा कार्यक्रम बहुमतले पारित भएको छ।

मङ्गलबार बसेको प्रदेश सभा बैठकले बहुमतले नीति तथा कार्यक्रम पारित गरेको हो। जेठ २४ गते प्रदेश सरकारले नीति तथा कार्यक्रम सदनमा प्रस्तुत गरेको थियो। नीति तथा कार्यक्रममाथिको छलफलमा सबै प्रदेश सभा सदस्यहरुले भाग लिएका थिए।

छलफलमा सत्तापक्षका प्रदेश सभा सदस्यले थप्नुपर्ने विषयमा सुझावसहित नीति तथा कार्यक्रमको समर्थन जनाएका थिए। यसैगरी, प्रतिपक्षी दलबाट प्रतिनिधित्व गर्नु हुने प्रदेश सभा सदस्यहरुले पुरानै निरन्तरता र कर्मकाण्डी भन्दै नीति तथा कार्यक्रमको विरोध गरेका थिए।

नीति तथा कार्यक्रम माथिको अन्तिम दिनको छलफलमा प्रदेश सभा सदस्यहरु जानकी ऐर बम, धर्मराज पाठक, टीका थापा, देवानसिंह विष्ट, हिरा सार्की, बेलबहादुर रानामगर, गीता चौधरी लगायतकाले भाग लिनु भएको थियो।

नीति तथा कार्यक्रममाथिको छलफलको क्रममा उठेको प्रश्नको जवाफ दिनुहुँदै मुख्यमन्त्री कमलबहादुर शाहले सत्तापक्ष, प्रतिपक्षबाट नीति तथा कार्यक्रममाथि राखिएको विचार, समर्थन, आलोचनाका लागि सरकारको तर्फबाट धन्यवाद ज्ञापन गर्नुभयो।

उहाँले प्रदेश सभा सदस्यहरुले नीति तथा कार्यक्रमको प्राथमिकता, कार्यदिशा, महत्वकांक्षा र कार्यान्वयन पक्ष गरी मूलभूत रुपमा तीन वटा पक्षमा आ–आफ्ना विचार राखेको बताउनुभयो।

प्रदेश सभामा प्रतिनिधित्व गर्ने सत्तापक्ष वा प्रतिपक्ष जुनसुकै तर्फका प्रदेश सभा सदस्यहरु परिवर्तनको पक्षमा रहेको मुख्यमन्त्रीको भनाइ थियो। “यो खुशीको विषय हो”, उहाँले अगाडि थप्नुभयो,“कोही पनि माननीयहरु अब परिवर्तन हुनु हुँदैन है भन्ने अथवा व्यक्तिवादी चाहना मैले पाएन।”