आन्दोलन हिंसात्मक बन्दै गएपछि अमेरिकाका विभिन्न शहरमा कर्फ्यू

आन्दोलन हिंसात्मक बन्दै गएपछि अमेरिकाका विभिन्न शहरमा कर्फ्यू जारी भएको छ । ४६ वर्षका अश्वेत व्यक्ति जर्ज फ्लोइडको मिनेशोटा राज्यको मिनियापोलसमा रहेको प्रहरी चौकीमा निधन भएपछि त्यसको विरोधमा अमेरिकाका विभिन्न शहरमा प्रदर्शन भइरहेको छ ।

फ्लोइडलाई गएको सोमबार प्रहरी अधिकारीले घाँटीमा घुँडाले थिचेर पक्राउ गर्दै गरेको भिडियो सामाजिक सञ्जालमार्फत सार्वजनिक भएपछि विरोध प्रदर्शन सुरु भएको हो ।

फ्लोइडको प्रहरी हिरासतमै निधन भयो । उनको हत्या अभियोगमा बर्खास्तमा परेका घाँटी थिच्ने प्रहरी अधिकारीलाई पक्राउ गरी मुद्दा चलाइएको छ । तर पनि मिनेशोटासहित अमेरिकाका विभिन्न शहरमा प्रदर्शन जारी छ ।

प्रदर्शनकारीले प्रहरीमाथि ढुंगा प्रहार गर्ने तथा प्रहरी चौकी र सवारी साधान तोडफोड एवम् आगजनी गरिरहेका छन् । विभिन्न स्थानमा लुटपाट पनि भएका छन् ।

प्रदर्शन नियन्त्रणमा लिनका लागि प्रहरीले अश्रुग्यास प्रहार गर्नेसहितका उपायहरु गरिरहेको छ । तर पनि अवस्था नियन्त्रण भन्दा बाहिर गएपछि मिनियापोलस, एट्लान्टा, लस एन्जलस, फिलाडेलफिया, पोर्टल्याण्ड, लुइसभिलासहितका शहरमा कर्फ्यू जारी भएको छ । कर्फ्यू तोडेर पनि विभिन्न शहरमा प्रदर्शन भइरहेको छ ।