भारतमा कोरोनाको संक्रमण तिब्र गतिमा : एकैदिन करिब १० हजार संक्रमित

२५ जेठ, काठमाडौँ । छिमेकी मुलुक भारतमा कोरोनाको संक्रमण तिब्र गतिमा बढीरहेको देखिएको छ ।

भारतीय स्वास्थ्य मन्त्रालयले दिएको पछिल्लो अपडेट अनुसार २४ घण्टामा ९ हजार ९७१ जना संक्रमित पुष्टि भएको छ । यो भारतमा एकैदिनमा संक्रमित भएको अहिलेसम्म कै धेरै संख्या हो ।

भारतमा कुल कोरोना संक्रमितको संख्या अहिले २ लाख नाघेको छ ।

भारतमा अहिलेसम्म २ लाख ४६ हजार ६२८ जना संक्रमित भएका छन् । भारत धेरै संक्रमण हुने देशमा छैठौ स्थानमा उक्लिएको छ । योसँगै भारतमा इटालीमा भन्दा धेरै संक्रमित भएका छन् । इटालीमा अहिलेसम्म २ लाख ३४ हजार ८०१ जना संक्रमित भएका छन् ।

त्यस्तै २४ घण्टामा भारतमा २८७ जनाको मृत्यु भएको छ । योसँगै भारतमा कोरोनाबाट मृत्यु हुनेको संख्या कुल ६ हजार ९२९ पुगेको छ ।

भारतमा अहिलेसम्म एक लाख १९ हजार २९२ जना ठिक भएका छन् भने एक लाख २० हजार ४०६ कोरोना संक्रमित विरामी उपचारत रहेका छन् ।

त्यसैगरी विश्वभर कोरोना संक्रमितको संख्या ६९ लाख ७६ हजार ४५ पुगेको छ भने मृतकको संख्या ४ लाख २ हजार १७० पुगेको छ ।

त्यस्तै विश्वभर ३४ लाख ११ हजार ७८८ जना कोरोना संक्रमित ठिक भएका छन् ।