मुगुको मुन्दु गाउँमा एकै परिवारका चार जनाको विभत्स हत्या

काठमाण्डौंः मगु जिल्लाको छायाँनाथ रारा नगरपालिका–६ को मुन्दु गाउँमा एकै परिवारका चारजनाको हत्या भएको छ । आमा, दुई छोरा र एक छोरीसहित चार जनाको रहस्यमय हत्या भएको प्रहरीले जनाएको छ ।

छायाँनाथ रारा नगरपालिका–६ मुन्दु गाउँकी २६ वर्षिय श्रीदेवी बोहोरा, उनका ११ र १ वर्षीय छोरा मनोज र रहर तथा ७ वर्षीय छोरी अप्सराको हत्या भएको जिल्ला प्रहरी कार्यालय मुगुका प्रहरी नायव उपरीक्षक विरेन्द्र थापाले जानकारी गराए ।

आज शुक्रवार विहान ११ बजे गाउँलेले खवर गर्न साथ प्रहरी उपरीक्षक थापाको नेतृत्वमा नै प्रहरी घटनास्थलमा पुगेको थियो । उक्त घटनाको प्रारम्भिक अनुसन्धान अनुसार मृतक श्रीदेवी छोराछोरीसहित ७ गते बिहान दशैको टिका थाप्न सोही वडाको तल्लो वस्ती माइती गाउँ कोटिल्ला गएका थिए । ८ गते बेलुका घर फर्केका उनीहरुको सोही राती हत्या भएको अनुमान गरिएको छ ।

९ गते विहानैदेखि घर बाहिर ताला लगाएको देखीएपछि छिमेकीले विहानै सिमी टिप्न खेतमा गएका होलान सोचेका रहेछन् । तर १० गते पनि घरमा ताला लगाएको देखेपछि गाउँलेहरुले फेरि माइती गएकी होला भनी उतै फोन गर्दा ८ गते नै फर्केको भनेपछि गाउँलेहरुले शुक्रवार विहान १० बजेतिर ढोकाको ताला तोडी हेर्दा चार जनाको विभत्स हत्या भएको देखेका थिए ।

मृतकका श्रीमान् वैदशिक रोजगारमा रहेका छन् । कसले के उद्देश्यका लागि हत्या गरेको त्यो खुल्न सकेको छैन । सवै क्षेत्रबाट विस्तृत अनुसन्धा गरी हत्यारा पत्ता लगाई हत्यारालाई कानुनको कठघरामा ल्याएर छाड्ने प्रनाउ विरेन्द्र थापाले बताए ।

हत्या गरेका चारै जनाको शव पोष्टमार्टमका लाग जिल्ला अस्पताल मुगुमा राखिएको छ । घटनास्थल सदरमुकाम गमगढीदेखि पैदल ३ घण्टा टाढा छ ।