उत्तर कोरियाद्धारा दक्षिणसंगका सबै सम्बन्ध तोडेको घोषणा

एजेन्सी । उत्तर कोरियाले दक्षिणसंगका सबै सम्बन्ध तोडेको घोषणा गरेको छ । उत्तर कोरियाले आफ्नो प्रतिद्वन्दीका रुपमा रहेको दक्षिण कोरियासंगको सम्पूर्ण सैन्य र राजनीतिक सम्बन्ध तोडेको घोषणा गरेको हो ।

उत्तरको आक्रोशपूर्ण शब्दहरुका अनुसार दक्षिण कोरियाले शत्रुतापूर्ण गतिविधिको पहिलो सुरुवात गरेको उल्लेख छ । यसबाट सिओल र प्योंङयाङबीचको सम्बन्धमा कटुता आएको छ ।

उत्तरले तोडेको घोषणा गरेको सम्बन्धहरुमा दुवै देशका शीर्ष नेताबीचको हटलाईन टेलिफोन सम्वाद पनि समावेश रहेको छ । उत्तर कोरियाको सरकारी न्युज एजेन्सी केएनसिएले भनेको छ, ‘उत्तर र दक्षिण कोरियाबीचका सबै सम्बन्ध तोडिएका छन ।’

उत्तर कोरियाको सिमा क्षेत्रमा दक्षिण तर्फबाट पर्चाबाजी भएको र त्यसको नियन्त्रणका लागि दक्षिणले कुनै प्रयास नगरेको आरोप उत्तरले लगाएको छ । यहि विषयलाई लिएर सैन्यलगायतका सबै सम्बन्धहरु ताडिएको केएनसिएले जनाएको छ ।

उत्तरको सिमावर्ती शहर कएसोंगमा बनाइएको सम्पर्क कार्यालय पनि मंगलबारदेखि बन्द गरिएको छ । सन २०१८ मा दुवै मुलुकबीच वार्ता सुरु हुँदा तनाव कम गर्ने उद्देश्यले सम्पर्क कार्यालय स्थापना गरिएको थियो ।

दुवै मुलुकबीच वार्ताको कुनै सम्भावना नरहेको विषयमा जोड दिंदै उत्तर कोरियाली न्युज एजेन्सी केसीएनएले भनेको छ, ‘अब कुनै पनि विषयमा दक्षिण कोरियाली प्रशासनसंग प्रत्यक्ष वार्ता गर्न जरुरी छैन ।

किनकी दक्षिणले हामीलाई निराश मात्रै बनाएको छ ।’ यसअघि उत्तर कोरियाका सर्वोच्च नेता किम जोङ उनकी बहिनी किम यो जोङले आफ्नो सिमा क्षेत्रमा पर्चाबाजी गर्ने विद्रोहीहरुविरुद्ध कारवाही नगरे दक्षिणसंगको सबै सम्बन्ध तोड्ने चेतावनी दिएकी थिइन । दक्षिण कोरियालाई दिईएको यहि चेतावनी पछि उत्तर कोरियाले आफ्नो यस्तो घोषणा सार्वजनिक गरेको हो ।