बर्दिया । मधुवन नगरपालिका –६ की महिला स्वास्थ्य स्वयंसेविका सुशीला गिरीले हाल सम्म स्वास्थ्य बिमा गर्नुभएको छैन ।
उहाँले कमजोर आर्थिक अवस्था भएको हुनाले स्वास्थ्य बिमा नगरेको बताउनुभयो । ‘सरकारले स्वास्थ्य स्वयंसेविकालाई दिएको सेवा सुविधाले घर धान्न पनि मुस्किल छ ।’ उहाँले भन्नुभयो–‘कसरी स्वास्थ्य बिमा गर्नु?’
गुलरिया नगरपालिका–७ की महिला स्वास्थ्य स्वयंसेविका मञ्जु यादवले पहिला स्वास्थ्य बिमा गरे पनि अहिले नवीकरण गर्नुभएको छैन । आर्थिक अभावले गर्दा बिमाको नवीकरण गर्न नसकेको उहाँले बताउनुभयो ।
बर्दियामा आठ सय ३७ जना महिला स्वास्थ्य स्वयंसेविका रहेका छन् जसमध्ये दुई सय ९९ जनाको मात्र स्वास्थ्य बिमा भएको छ । ६४.२८ प्रतिशतले स्वास्थ्य बिमा नगरेको स्वास्थ्य कार्यालय बर्दियाले जनाएको छ ।
स्वास्थ्य बिमा बोर्डले महिला स्वास्थ्य स्वयंसेविकाको परिवारको स्वास्थ्य बिमा गर्दा ५० प्रतिशत छुट दिने गरेको छ । तर पनि स्वास्थ्य स्वयंसेविकाहरू बिमाको पहुँचमा भने छैनन् । स्वास्थ्य बिमा बोर्डका जिल्ला संयोजक रुपेश आचार्यले स्वयंसेविकाले नेपाल सरकारले उपलब्ध गराएको परिचय पत्रसहित दर्ता सहयोगी मार्फत बिमा गर्दा छुट हुने बताउनुभयो ।
संघ, प्रदेश वा स्थानीय सरकारले स्वयंसेविकाको निःशुल्क स्वास्थ्य बिमा गराउनुपर्ने महिला स्वास्थ्य स्वयंसेविकाहरूको माग रहेको छ ।
नेपाल स्वास्थ्य क्षेत्रमा पहुँच पुर्याउनका महिला स्वास्थ्य स्वयंसेविकाहरूको महत्त्वपूर्ण भूमिका रहेको छ । विशेष गरी नेपालमा बाल मृत्युदर र मातृ मृत्युदर कम हुनुमा स्वास्थ्य स्वयंसेविकाको महत्वपूर्ण योगदान रहेको छ ।
बर्दियाका महिला स्वास्थ्य स्वयंसेविकालाई स्वास्थ्य बिमाको पहुँचमा ल्याउन जरुरी रहेको स्वास्थ्य कार्यालय बर्दियाका वरिष्ठ जनस्वास्थ्य अधिकृत गोकर्ण गिरीले बताउनुभयो ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया