मंग्सिर ६, २०८३ आइतबार November 22, 2026

योग स्वास्थ्य र कल्याणको मार्ग हो : मुख्यमन्त्री महरा

योग शारीरिक अभ्यास मात्र नभएर मानसिक शान्ति, आत्म–अन्वेषण र समग्र स्वास्थ्यको महत्वपूर्ण प्रणालीका रुपमा विकास भएको भनाई

शेयर गर्नुहोस:
फन्ट परिवर्तन गर्नुहोस: अ अ अ

मर्चवार, (लुम्बिनी), ६ असार : लुम्बिनी प्रदेशका मुख्यमन्त्री जोखबहादुर महराले योग स्वास्थ्य र कल्याणको मार्ग रहेको बताउनुभएको छ ।

भारतीय राजदूतावास, लुम्बिनी विकास कोषसहितको आयोजनामा आज लुम्बिनीमा आयोजित अन्तर्राष्ट्रिय योग दिवसलाई सम्बोधन गर्दै मुख्यमन्त्री महराले योग शारीरिक अभ्यास मात्र नभएर मानसिक शान्ति, आत्म–अन्वेषण र समग्र स्वास्थ्यको महत्वपूर्ण प्रणालीका रुपमा विकास भएको बताउनुभएको हो ।

“योगले हामीलाई आत्म–ज्ञान हासिल गर्न, मानसिक सन्तुलन कायम गर्न तथा एकता र करुणाको भावना जागृत गर्न सहयोग पु-याउँछ”, उहाँले भन्नुभयो । योगले प्रतिरोधात्मक क्षमता र मानसिक दृढता बढाउने उहाँको भनाइ छ । मुख्यमन्त्री महराले लुम्बिनी प्रदेश सरकार नागरिकको स्वास्थ्य र कल्याण प्रवर्द्धनका लागि प्रतिबद्ध रहेको बताउनुभयो ।

उहाँले योगका फाइदालाई स्वीकार्दै सार्वजनिक स्वास्थ्यसम्बन्धी पहलमा समावेश गर्न र प्रत्येक व्यक्तिले योगलाई दैनिक जीवनमा समावेश गर्न प्रेरित गर्न आग्रह गर्नुभयो । “यस प्राचीन अभ्यासको रूपान्तरणकारी शक्ति अनुभव गर्न म सबैलाई आह्वान गर्दछु”, उहाँले भन्नुभयो । गौतम बुद्धको जन्मस्थलमा अन्तर्राष्ट्रिय योग दिवसलाई सम्बोधन गर्न पाउँदा खुसी र आनन्द भएको उहाँले बताउनुभयो ।

नेपाल र भारतबीचको सांस्कृतिक सम्बन्धलाई प्रगाढ बनाएको बताउँदै लुम्बिनी प्रदेश सरकारका तर्फबाट मुख्यमन्त्री महराले भारतीय दूतावासलाई धन्यवाद दिनुभयो । नेपालका लागि भारतीय राजदूत नविन श्रीवास्तवले भगवान् बुद्धको जन्मस्थस्थलमा अन्तर्राष्ट्रिय योग दिवस मनाउँदा यसले पर्यटन प्रवर्द्धन हुने बताउनुभयो । उहाँले गत वर्षदेखि लुम्बिनीमा योग दिवस मनाउन शुरु गरिएको र अब प्रत्येक वर्ष जुन २० तारिखका दिन अन्तर्राष्ट्रिय योग दिवस मनाउने जानकारी दिनुभयो । लुम्बिनीको प्रचारप्रसारका लागि भारतीय दूतावासले विभिन्न कार्यक्रम गर्दै आएको श्रीवास्तवले बताउनुभयो ।

कार्यक्रममा लुम्बिनी विकास कोषका सदस्य सचिव सानुराजा शाक्यले बुद्धको दुःखबाट मुक्त गर्ने मार्ग जस्तै योग अभ्यासले फाइदा गर्ने धारणा राख्नुभयो । उहाँले लुम्बिनी विकास कोषले भारतीय दूतावाससँग सहकार्य गरेर कार्यक्रम गरेको बताउँदै लुम्बिनीको विश्वव्यापी प्रवर्द्धनका लागि आगामी दिनमा सहकार्य गर्न इच्छुक रहेको बताउनुभयो । सदस्य सचिव शाक्यले सुनौली नाकामा व्यवस्थित एकीकृत अध्यागमन कार्यालय बनाउन मुख्यमन्त्री र राजदूतको ध्यानाकर्षण गराउनुभयो । उहाँले नाकामा पर्यटकले दुःख पाइरहेको बारे गुनासो गर्नुभयो ।

राजदूत श्रीवास्तवले मायादेवी मन्दिरको दर्शन गर्नुभएको थियो । उहाँलाई लुम्बिनी विकास कोषका सूचना तथा जनसम्पर्क प्रमुख डा हरिध्वज राईले लुम्बिनीका बारेमा बिफ्रिङ गर्नुभएको थियो । कार्यक्रममा पूर्वमन्त्री हृदयेश त्रिपाठी, देवेन्द्रराज कँडेल, लुम्बिनी सांस्कृतिक नगरपालिकाका नगरप्रमुख सजरुद्दीन खाँ, पतञ्जली योगमा आबद्ध रुपन्देही, कपिलबस्तु र नवलपरासीका योग गुरु, योग अभ्यासकर्ता, उद्योगी व्यवसाय र स्थानीयहरुको उपस्थिति रहेको थियो ।

प्रत्येक वर्ष जुन २१ का दिन अन्तर्राष्ट्रिय योग दिवस मनाउने गरिएको छ । भारतीय राजदूतावास, लुम्बिनी विकास कोष, बिपी कोइराला भारत नेपाल फाउण्डेशन, पतञ्जली योगपिठ नेपालले संयुक्त रुपमा आज दिवस मनाएको हो । रासस

युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।

यो खबर पढेर तपाईलाई कस्तो महसुस भयो ?

प्रतिक्रिया

ताजा अपडेट
तल्लो अरुण जलविद्युत् आयोजना : सोमबार शिलान्याश हुँदै
२०८३ मंग्सिर ६, आइतबार
दूधको मूल्य प्रतिलिटर ८० रुपैयाँ कायम गर्न धनकुटाका किसानको माग
२०८३ मंग्सिर ६, आइतबार
अमेरिकी सेयर बजारमा १० प्रतिशत गिरावट, लगानीकर्तामा अनिश्चितता
२०८३ मंग्सिर ६, आइतबार
साहित्यकारले विकृतिमाथि प्रश्न उठाउँदै सकारात्मक प्रयासलाई प्रोत्साहन गर्नुपर्छ : सभामुख अर्याल
२०८३ मंग्सिर ६, आइतबार
पर्सामा आर्थिक अपराधका घटना सबैभन्दा बढी, एक महिनामा ४९ मुद्दा दर्ता
२०८३ मंग्सिर ६, आइतबार
सन्दीपको घातक बलिङ र कुशलको अर्धशतक, यूएईमाथि नेपालको ६ विकेटको शानदार जित
२०८३ मंग्सिर ६, आइतबार
झापा महिला गोल्डकप : १० गोल गर्दै आर्मीले काट्यो सेमिफाइनलको टिकट
२०८३ मंग्सिर ६, आइतबार