जनमत पार्टीद्धारा सभामुख घिमिरेको राजीनामा माग (पत्रसहित)

काठमाण्डौंः डा. सिके राउत नेतृत्वको जनमत पार्टीले सभामुख देवराज घिमिरेको राजीनामा माग गरेको छ ।

यसअघि पार्टीको गतिविधिविरुद्ध काम गरेको भन्दै समानुपातिक सांसद सोभा लाभ सापकोटालाई कारबाही गरेको जनमतले उनलाई हटाउन भन्दै पटकपटक संसद् सचिवालयमा निवेदन दिइसकेको छ । तर सभामुखले सापकोटलाई नहटाएको भन्दै असन्तुष्टि जनाएको हो ।

त्यस्तै सभामुखले सापकोटा एमालेमा जाने तयारी गरेका कारण उनलाई कारबाही नगरी संरक्षण गरेको आरोप जनमत पार्टीको रहेको छ ।

‘कोही प्रतिनिधि सभा सदस्य सभामुखको नातेदार र समुदायको मान्छे पर्यो भन्दैमा र सभामुखको (पूर्व) पार्टी नेकपा (एमाले) मा जाने बचनबद्धता गर्यो भन्दैमा जनमत पार्टीले केन्द्रीय समितिको सम्पूर्ण प्रक्रिया पुर्याइ कारबाही सदर गरिसकेको सदस्यलाई यसरी गैरसंवैधानिक कदमविरुद्ध रक्षा गर्ने सभामुले अविलम्ब राजीनामा दिनुपर्दछ,’ सो पार्टीका प्रवक्ता डा. शरदसिंह यादवद्वारा जारी विज्ञप्तिमा भनिएको छ ।

सांसद सापकोटाले पार्टी फुटाउन लागेको भन्दै जनमतले उनलाई साधारण सदस्य समेत नरहने गरी कारबाही गरेको थियो ।