फाल्गुनन्द गोल्डकपमा आज मछिन्द्र क्लब र झापा–११ बीच प्रतिस्पर्धा हुने

पाँचथर । आयोजक फिदिम स्पोर्टिङ क्लवसँग टाइब्रेकरमा ५–४ गोल अन्तरले स्तब्ध हुँदै पाहुना टोली भारतको खर्साङ फुटवल क्लव ११ औं संस्करणको फाल्गुनन्द गोल्डकपको उद्घाटन खेलबाटै घर फर्किएको छ ।

फिदिम खेलमैदानमा शनिबारदेखि सुरु भएको प्रतियोगिताको उद्घाटन खेलमा घरेलु दर्शकको समर्थन पाएको फिदिम स्पोर्टिङ क्लवसँग खर्साङले गोलरहित बराबरी खेलेको थियो । खेलको निर्धारित समयमा दुबैतर्फबाट गोल हुन नसकेपछि खेलको निर्णय सोझै टाइब्रेकरबाट लिइएको थियो । टाइब्रेकरमा फिदिम स्पोर्टिङका आशिष चापागाई, राम वाजी, सुकराज राई, निरोज लिङदेन र बिशाल दर्जीले गोल गरे ।

खर्साङ फुटवल क्लवका आकाश प्रधान, बिशाल भण्डारी, रुस्तम प्रधान र प्रशान्त क्षेत्रीको प्रहारले जाली चुम्दा जोगेल लामाको प्रहार फिदिम स्पोर्टिङका गोलकिपर मिराक खजुमले बचाए । खेलको प्लेयर अफ् द म्याच फिदिम स्पोर्टिङ क्लवका गोलकिपर मिराक खजुम भए । उनले नगद दश हजार रुपैंयाँ प्राप्त गरेका छन् ।

प्रतियोगिता अन्तर्गत आइतबार मछिन्द्र फुटवल क्लव काठमाडौं र झापा–११ बीच प्रतिस्पर्धा हुने आयोजक फिदिम स्पोर्टिङ क्लवका अध्यक्ष दीपेन्द्र थापा मगरले बताए । पुस १५ गतेसम्म सञ्चालन हुने प्रतियोगिताको विजेताले नगद दश लाख ५५५ रुपैंयाँ र उपविजेताले नगद पाँच लाख ५५५ रुपैंयाँ प्राप्त गर्नेछ ।