बुढासुब्बा गोल्डकप फुटबल प्रतियोगिता माघमा हुने

सुनसरी । मोफसलकै प्रतिष्ठित बुढासुब्बा गोल्डकप फुटबल प्रतियोगिताको २५ औं संस्करण माघमा हुने भएको छ । आयोजक धरान फुटबल क्लबले सोमबार पत्रकार सम्मेलन गर्दै माघ १९ देखि २६ सम्म प्रतियोगिता गर्ने जानकारी दिएको हो ।

धरान–१६ स्थित धरान रंगशालामा हुने प्रतियोगितामा आयोजकसहित ८ टिम सहभागी हुने अध्यक्ष प्रताप तामाङले बताए । नेपालका ए डिभिजनका ५ क्लबसहित भारत र भुटानका क्लब प्रतिस्पर्धी हुनेछ ।

गत वर्ष विजेता एनआरटी, लिग च्याम्पियन चर्च ब्वाइज, नेपाल पुलिस, त्रिभुवन आर्मी, मछिन्द्र फुटबल क्लब, भुटान फुटबल एकेडेमी, यूके एफसी भारत, काँकडभिट्टा फुटबल ट्रेनिङ सेन्टर झापा, राष्टिय जागृति क्लब इटहरी र आयोजक धरान फुटबल क्लबले भाग लिने आयोजकले जनाएको छ । विजेताले १० लाख र उपविजेताले ५ लाख पाउनेछन् ।

उत्कृष्ट खेलाडीले १ लाख पाउनेछन् । म्यान अफ द म्याचले १५ हजार, सर्वाधिक गोलकर्ताले ३५ हजार तथा विधागत उत्कृष्टले जनही २५ हजार पुरस्कार पाउनेछन् । प्रतियोगितामा ९८ लाख ७५ हजार खर्च हुने र १ करोड २ लाख २५ हजार रुपैयाँ आम्दानी गर्ने लक्ष्य रहेको आयोजकले बताएका छ । प्रतियोगितालाई धरान उपमहानगर पालिकाले संयोजन गरेको छ ।