भैरहवामा १०० श्य्याको क्यान्सर अस्पताल बन्ने

काठमाण्डौः भैरहवामा १०० श्य्याको क्यान्सर अस्पताल बन्ने भएको छ । दुई वर्षभित्र सञ्चालनमा ल्याउनेगरी भैरहवामा सुमित्रा मेमोरियल क्यान्सर अस्पताल बन्ने भएको हो ।

अमेरिकामा कार्यरत क्यान्सर प्राविधिक विशेषज्ञ डा. सागर पोखरेलसहित स्वास्थ्य क्षेत्रको टीमले ‘आफ्नै देशमा फर्केर केही गरौं’ भन्ने उद्देश्यसहित १ अर्ब ५० करोड रूपैयाँको लागतमा आउँदो २०८३ भित्र सञ्चालनमा ल्याउनेगरी जुटेका हुन् ।

अस्पतालबाट लुम्बिनी प्रदेश मात्र नभई भारतको उत्तरप्रदेश र बिहारसहित बिरामीले सेवा पाउनेछन् । युरोपमा कार्यरत युवा व्यवसायी हरि खत्री, बेलायतमा रहेका गोकर्ण खड्का र रूपन्देहीमा विगत एक दशकदेखि सिद्धार्थनगर सिटी अस्पताल सञ्चालन गरिरहेका अर्जुन पौडेलको टीम क्यान्सर अस्पताल खोल्न जुटेको हो ।

क्यान्सरको उपचारको लागि अत्याधुनिक उपकरण लिनियर एक्सिलेटरको सुविधासहित सञ्चालन हुने अस्पतालको नाम सुमित्रा मेमोरियल क्यान्सर अस्पताल रहने छ ।

अस्पतालका प्रमुख संरक्षक अर्जुन पौडेलले अस्पताल भवन निर्माणको लागि नक्साङ्कन र र वातावरणीय प्रभाव मूल्याङ्कनको काम तीब्र रूपमा चलिरहेको बताए । पौडेलका अनुसार विसं २०७६ माघमा आमा सुमित्रा उपाध्यायको क्यान्सरकै कारण निधन भएपछि क्षेत्रमा अस्पतालको आवश्यकता महसुस गरिएको हो । उनको दिल्लीमा उपचार गरेर ल्याएको एक वर्षपछि निधन भएको थियो । ‘हाम्रो टीमले क्यान्सर रोगको उपचार पद्धति भित्र्याउने उद्देश्यका साथ सम्भाव्यता अध्ययन गर्न बैंकक, बंगलादेश, भारत र संयुक्त राज्य अमेरिकामा रहेका अत्याधुनिक स्तरका क्यान्सर अस्पतालमा पुगेर अध्ययन गरेपछि निर्माणको तयारी थालेको हो,’ उनले भने ।

अस्पताल पहिलो चरणमा १०० श्य्या क्षमताको हुनेछ । क्यान्सर स्पेसलिस्ट अस्पतालको रूपमा अस्पतालअघि बढेको छ । सिद्धार्थनगर सिटी अस्पतालकै एउटा अंगको रूपमा क्यान्सर अस्पताल सञ्चालनमा आउनेछ । अहिले पनि क्यान्सर रोगको उपचारको लागि नारायणी नेपालका पश्चिम क्षेत्रका नागरिक काठमाडौं, चितवन अथवा भारतसम्म पुग्नुपर्ने बाध्यता छ ।

बाँकेको खजुरमा रहेको सुशील कोइराला प्रखर क्यान्सर अस्पताल रहे पनि आवश्यक जनशक्ति र उपकरण नहुँदा उपचारमा पटक–पटक समस्या हुँदै आएको छ । क्यान्सर रोगका बिरामीहरू आफैंमा एकदमै कमजोर हुने हुनाले टाढा जानुपर्ने बाध्यात्मक परिस्थितिका कारण दुःख पाउने गरेका छन् ।

सोही कुरालाई मध्यनजर गर्दै क्यान्सर अस्पताल निर्माण गर्ने योजना बनाएको डा. सागर पोखरेल बताए । ‘आफू जन्मिएको देशमा लगानी गरौं भन्ने उद्देश्यका साथ अस्पताल निर्माण शुरू गर्न लागिएको हो,’ उनले भने ।

अर्का लगानीकर्ता हरि खत्रीले क्यान्सर रोगको सबै खालको उपचार हुनेगरी अस्पताल सञ्चालनमा ल्याउने बताए । खत्रीले पश्चिम नेपालमा क्यान्सर रोगको उपचारलाई कठिनाइ भएको महसुस गर्दै आफूहरूले लगानी गर्न लागेको बताए ।

अस्पतालमा क्यान्सर रोगबाट परिवारको सदस्य गुमाएका तथा क्यान्सर पीडितको परिवारले पनि लगानी गर्न मिल्नेगरी उच्च प्राथमिकतामा राखिएको लगानी कर्ताहरूको भनाइ छ । भैरहवामा मेडिकल कलेज (युनिभर्सल कलेज अफ् मेडिकल साइन्स) पनि छ ।