काठमाडौं : काठमाडौं र पोखरा जिल्ला अदालतबाट धरौटीमा रिहा भएका राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध रुपन्देही जिल्लामा अर्को मुद्दा दर्ता गर्ने तयारी भएको छ ।
जिल्ला सरकारी वकिलको कार्यालय रुपन्देहीले पूर्वगृहमन्त्रीसमेत रहेका लामिछाने र उनका साझेदार एवं गोर्खा मिडियाका तत्कालीन संचालक छविलाल जोशीसहितविरुद्ध जिल्ला अदालतमा मुद्दा दायर गर्न लागेको हो ।
बुटवलस्थित सुप्रिम सहकारी संस्थाको बचत रकम ठगी प्रकरणमा लामिछानेसहितका प्रतिवादीहरूविरुद्ध शुक्रबार पूरक अभियोग दर्ता गर्ने तयारी सरकारी वकिल कार्यालयको छ ।
कार्यालयले बिहीबार १७ जनाविरुद्ध थप अभियोगपत्र दायर गरेको छ । गोर्खा मिडिया नेटवर्कमा रविका साझेदार तथा सुप्रिम सहकारीका संचालक गितेन्द्रबाबु राई (जीबी)सहित २८ जनाविरुद्ध पहिले नै अभियोग दर्ता भइसकेको छ ।
बिहीबार थप अभियोगमा प्रतिवादी जीबीसहित १७ जनाविरुद्ध संगठित अपराधको कसुर समावेश गरिएको जिल्ला सरकारी वकिलको कार्यालयले जनाएको छ ।
युगखबर अनलाइनमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
प्रतिक्रिया