मेयर कैलाश कुमार आले बुद्धिचाल प्रतियोगिताको च्याम्पियन

भोजपुर । भोजपुर नगरपालिकाका मेयर कैलाश कुमार आले भोजपुर जिल्ला बुद्धिचाल सङ्घद्वारा आयोजित प्रथम भोजपुर जिल्ला बुद्धिचाल प्रतियोगिताको च्याम्पियन बनेका छन् ।

भोजपुर उद्योग वाणिज्य सङ्घको सभा हलमा भएको खेलमा सत प्रतिशत जीत दर्ता गर्दै भोजपुर नगरपालिका वडा नम्बर सातका मेयर आले च्याम्पियन बनेका हुन । आलेले हेमा राई, राजकुमार राई, संग्राम राई, टिकाराम राई, उमेश मगर, नारायण तामाङ र प्रदीप कुमार राईलाई पराजित गरेका थिए ।

यस्तै पाँच जीत, एक बराबरी र एक हारको नतिजा निकालेका आमचोक गाउँपालिकाका उमेश मगर दोस्रो भएका छन् । मगर च्याम्पियन बन्न सफल आलेसँग पाँचौँ चरणमा पराजित भएका थिए भने टिकाराम राईसँग अङ्क बाडेका थिए ।

समान पाँच अङ्क जोड्न सफल भोजपुर नगरपालिका वडा नम्बर–छ, देउरालीका नारायण तामाङ, टेम्केमैयुङ गाउँपालिका आठ, गोगनेका भगतकुमार राई, भोजपुर नगरपालिका पाँचका प्रदीपकुमार राई र टेम्केमैयुङ गाउँपालिका एक, तिम्माका टिकाराम राईले क्रमशः तेस्रो देखि छैटौँ स्थान हासिल गरे । यस्तै टेम्केमैयुङ गाउँपालिका पाँचका हेमराज राई उत्कृष्ट सात स्थानमा पर्न सफल भए ।

प्रतियोगिताको विधागत पुरस्कार तर्फ टेम्केमैयुङ गाउँपालिका एक, तिम्माकी सन्तोषी राई महिला प्रथम बनिन भने भोजपुर नगरपालिका सात भोटेपसलका संस्कार राई अन्डर १५ टपको पुरस्कार जित्न सफल बने । मङ्गलवारबाट सुरु प्रथम भोजपुर जिल्ला बुद्धिचाल प्रतियोगिता बुधवार सकिएको हो ।