डोलेश्वरमा महाशिवरात्रिको तयारी पूरा

भक्तपुर, १३ फागुनः केदारनाथको शीर मानिने डोलेश्वर महादेव मन्दिरमा महाशिवरात्रिको तयारी पूरा भएको मन्दिर संरक्षण तथा विकास समितिका महासचिव हरिशरण बस्नेतले जानकारी दिनुभएको छ । उहाँले आज रातिदेखि नै भक्तजनलाई सहज दर्शनको व्यवस्थासमेत गरिएको बताउनुभयो ।

महाशिवरात्रिका दिन सर्वसाधारणका लाग बिहान ४ देखि १२ बजेसम्म मन्दिरका चारै ढोका खुला गरिने छ । भक्तजनले मन्दिरको गर्भगृहमै पुगेर पूजा एवं दर्शन गर्न पाउने छन् । भक्तजनलाई पञ्चस्नानसमेत गर्ने व्यवस्था गरिएको उहाँको भनाइ छ ।

महाशिवरात्रिका लागि आएका साधुसन्तलाई समितिले खान, बस्न, धुनी बाल्न दाउराको व्यवस्था गरेको छ । यस पावन पर्वमा डोलेश्वर आउने साधुसन्त र बाबामध्ये ‘क’, ‘ख’ र ‘ग’ वर्गमा विभाजन गरी दक्षिणा एवं धोती दिएर बिदाइ गर्ने व्यवस्थासमेत गरिएको छ ।

यस वर्ष करिब चार सय जना साधुसन्त एवं बाबा मन्दिरमा आएको उहाँले बताउनुभयो । उहाँले दर्शनार्थीलाई लाइन बसेको आधा घण्टामा दर्शन गर्ने व्यवस्था गरिएको र मन्दिर अगाडि स्वास्थ्य शिविरको आयोजना गरिएको बताउनुभयो । महाशिवरात्रिका दिन मन्दिरमा एक लाखभन्दा बढी दर्शनार्थी आउने अनुमान गरिएको छ । रासस