मन्त्रिपरिषद्को बैठक बस्दै

काठमाण्डौं, ०३ वैशाख  । प्रधानमन्त्री केपी शर्मा ओलीले मन्त्रिपरिषद्को बैठक बोलाउनु भएको छ । प्रधानमन्त्री ओलीले आज साँझ ६ बजे बालुवाटारमा बस्ने गरी बैठक बोलाउनु भएको हो ।

आजै प्रधानमन्त्री ओलीले नेपाली कांग्रेसका सभापति शेरबहादुर देउवासँग भेटवार्ता गर्नुभएको थियो ।

दुई नेताबीच सरकारलाई प्रभावकारी बनाउने विषयमा छलफल भएको बालुवाटर स्रोतले जानकारी दिएको छ। दुई नेताबीच एक ढिक्का भएर अघि बढ्ने समझदारी भएको छ ।

पछिल्लो समय विपक्षी दलका नेता पुष्पकमल दाहालले नयाँ वर्षमा नयाँ सरकार बन्ने दाबी गरेपछि राष्ट्रिय राजनीति तरंगित बनेको छ ।

यही सन्दर्भमा प्रधानमन्त्री ओलीले देउवासँग आज छलफल गर्नुभएको हो ।

उहाँहरुबीचको भेटवार्तापछि सरकार सञ्चालनका लागि गठित दुई दलीय संयन्त्रको बैठक बोलाउने समझदारी पनि भएको छ । स्रोतका अनुसार बैठक बुधबार साँझ ५ बजे बस्ने तयारी छ ।