वडाले थाल्यो सामुदायिक विद्यालय सहयोग कार्यक्रम

काठमाण्डौं । दोलखाको भीमेश्वर नगरपालिका–७ ले सामुदायिक विद्यालयमा अध्ययनरत विद्यार्थीहरूको लागि निशुल्क शैक्षिक सामग्री वितरण सुरु गरेपछि स्थानीय तहको शैक्षिक उत्तरदायित्वप्रति सचेतता देखिएको छ।

“गुणस्तरीय शिक्षा हाम्रो अभियान, वडाका बालबालिका प्रति जनप्रतिनिधिको ध्यान” भन्ने मूल नाराका साथ सुरु गरिएको यो अभियान अन्तर्गत विद्यार्थीलाई कपि, कलम, पेन्सिल, इरेजर, पेन्सिल कटर जस्ता सामग्री दिइनेछ भने शिक्षकहरूका लागि पनि मार्कर र इङ्क जस्ता आवश्यक सामग्री उपलब्ध गराइनेछ।

वडाध्यक्ष विनोद तमाङका अनुसार, वडाको बजेटमै आधारित भएर सुरु गरिएको यो कार्यक्रम आर्थिक रूपमा कमजोर परिवारका विद्यार्थीलाई विद्यालयतर्फ आकर्षित गर्न र पढाइ नियमित गराउन सहयोगी हुनेछ। वडा नम्बर–७ मा रहेका ६ वटा सामुदायिक विद्यालयमा हाल ६५० जना विद्यार्थी अध्ययनरत छन्, जसमध्ये धेरैजसो विद्यार्थी विपन्न पृष्ठभूमिबाट आएका छन्।

वडाध्यक्ष तमाङ भन्छन्, “शैक्षिक सामग्री अभावकै कारण कति बालबालिका विद्यालय नियमित जान सक्दैनन्। यस्तो अवस्था अन्त्य गर्न हामीले यो कार्यक्रम ल्याएका हौं।”

वडा कार्यालयले कुटिडाँडा माध्यमिक विद्यालयमा एक विशेष कार्यक्रम आयोजना गरी शैक्षिक सामग्री वितरणको शुभारम्भ गरेको हो। कार्यक्रममा बागमती प्रदेशसभा सांसद भरतबहादुर केसी सहभागी थिए। उनले वडाको यो पहलले विद्यार्थीलाई नियमित रूपमा विद्यालय पुग्न उत्प्रेरित गर्ने विश्वास व्यक्त गरे।

अध्यक्ष तमाङले आफ्ना कार्यकालभरिमा कुनै पनि विद्यार्थीले व्यक्तिगत खर्चमा शैक्षिक सामग्री किन्न नपर्ने व्यवस्था मिलाउने अठोट व्यक्त गरे। साथै, उनले यो कार्यक्रम आफ्नो कार्यकालपछिसम्म पनि निरन्तर चलिरहने अपेक्षा राखेका छन्।

स्थानीय तहले शैक्षिक क्षेत्रमा गरेको यो पहल देशभरिका अन्य वडाका लागि पनि अनुकरणीय अभ्यास बन्ने आशा गरिएको छ।