पाकिस्तान र इरानबाट पाँच लाख अफगान शरणार्थी स्वदेश फर्किए

काठमाण्डौंः  पाकिस्तान र इरानबाट पछिल्ला दुई महिनामा करिब पाँच लाख अफगान शरणार्थीहरू अफगानिस्तान फर्किएको संयुक्त राष्ट्रसङ्घीय शरणार्थी उच्चायुक्त कार्यालय (यूएनएचसीआर) ले जनाएको छ ।

एप्रिल र मे महिनामा यति ठूलो सङ्ख्यामा नागरिक स्वदेश फर्किएको हो । आइतबार एक विज्ञप्ति जारी गर्दै यूएनएचसीआर ले भन्यो,“फर्किएकाहरू अनिश्चित भविष्य र कठिन परिस्थितिसँग जुझिरहेका छन्, त्यसैले उनीहरूलाई सहयोग आजको दिनमा अझ बढी आवश्यक छ ।”

पछिल्लो एक वर्षमा मात्रै पाकिस्तान र इरानबाट २० लाखभन्दा बढी अफगान नागरिक स्वदेश फर्किएको तथ्याङ्कमा देखिन्छ ।

पाकिस्तान सरकारले सन् २०२५ भित्र आफ्नो देशमा रहेका ३० लाख अफगान नागरिकहरूलाई स्वदेश फिर्ता पठाउने योजना अघि सारेको छ । त्यस्तै, इरानी अधिकारीहरूले कानुनी कागजातविना बसोबास गरिरहेका विदेशीहरूलाई स्वदेश फर्कन आग्रह गरेका छन् ।

यसैबीच, अफगानिस्तानको अन्तरिम सरकारले पनि पटक–पटक विदेशमा शरणार्थीको रूपमा बसिरहेका अफगानहरूलाई स्वदेश फर्कन र युद्धपीडित देशको पुनर्निर्माणमा सहभागी हुन आह्वान गर्दै आएको छ । रासस