रुस ६ हजार युक्रेनी सैनिकको शव बुझाउन तयार, युक्रेनले ‘प्रोपोगाण्डा’ भन्दै चासो नदेखाएको आरोप

काठमाडौँ, जेठ २५ । युक्रेन युद्धबीच रुसले आफ्ना सैन्य कारबाहीमा मारिएका युक्रेनी सैनिकहरूको शव युक्रेनी पक्षलाई हस्तान्तरण गर्न तयार रहेको बताएको छ। तर युक्रेनले अहिलेसम्म त्यसप्रति औपचारिक चासो नदेखाएको रूसी दाबी छ।

रुसी सञ्चारमाध्यम आरटी (Russia Today) का अनुसार रुसले युक्रेनी सैनिकहरूको शव बोकेका लरीहरू शनिबार युक्रेनी पक्षलाई हस्तान्तरण गर्न तयार गरेको थियो। तर युक्रेनी अधिकारीहरू लिन नआएपछि ती लासहरू फिर्ता लिइएको जनाइएको छ।

आज जारी विज्ञप्तिमा रुसी रक्षा मन्त्रालयले १२१२ वटा शव तत्काल हस्तान्तरण गर्न सकिने बताएको छ। मन्त्रालयले “हामी ६,००० भन्दा बढी युक्रेनी सैनिकहरूको शव बिना कुनै पूर्वशर्त हस्तान्तरण गर्न तयार छौँ” भन्ने स्पष्ट पारेको छ।

युक्रेनी पक्षले भने यो सबै रुसी प्रोपोगाण्डा मात्रै भएको दाबी गर्दै आएको छ। उनीहरूका अनुसार रुसले शव व्यवस्थापनमा आवश्यक प्रक्रिया नअपनाई युद्धलाई भावनात्मक हतियारका रूपमा प्रयोग गर्ने प्रयास गरिरहेको छ।

यसबीच युक्रेनी सैनिकका परिवारहरूले आफ्ना प्रियजनको शव खोज्न र बुझ्न सरकारले अग्रसरता देखाउनुपर्ने माग गर्दै आएका छन्। केही परिवारले अन्तर्राष्ट्रिय रेडक्रसजस्ता निकायहरूसँग पनि सम्पर्क गरिरहेका छन्।

अन्तर्राष्ट्रिय मानव अधिकार निकायहरूले युद्धमा मरेका सैनिकहरूको शव सम्मानपूर्वक बुझाउनु वा व्यवस्थापन गर्नु मानवीय तथा अन्तर्राष्ट्रिय कानून अनुसार अनिवार्य रहेको बताउँदै आएका छन्। रुसले शव फिर्ता दिन पहल गरे पनि प्रक्रिया, समन्वय र पारदर्शिता सुनिश्चित नहुँदा तनाव थपिएको छ। एजेन्सी