‘पृतनापति ट्रफी २०८२’ प्रतियोगिता सुरु, सेनाका एकाइबीच ७ खेलमा प्रतिस्पर्धा

सुनसरी । नेपाली सेनाको पूर्वी पृतनाको आयोजनामा ‘पृतनापति ट्रफी २०८२’ आजदेखि सुरु भएको छ। प्रतियोगिता सेनाका २, १८, र २१ नम्बर बाहिनी अन्तर्गतका गण, गुल्म तथा एकाइहरूबीच आयोजना गरिएको हो।

प्रतियोगितामा फुटबल, भलिबल, बास्केटबल, बक्सिङ, पौडी, जुडो र तेक्वान्दोजस्ता खेलहरूमा प्रतिस्पर्धा हुनेछ। आयोजकका अनुसार प्रतियोगिता असार ३० गते समापन हुनेछ।

नेपाली सेनाले हरेक वर्ष यस्ता प्रतियोगिता सञ्चालन गर्दै आएको छ, जसको उद्देश्य शारीरिक फिटनेससँगै सैनिकहरूमा खेल कौशल विकास गर्नु रहेको बताइएको छ। साथै, सेनाको खेलकुद विभागबाट राष्ट्रिय तथा अन्तर्राष्ट्रिय स्तरका उत्कृष्ट खेलाडीहरू उत्पादन हुँदै आएका छन्।

खेलकुद क्षेत्रका जानकारहरूका अनुसार सेनाको यो गतिविधि देशको समग्र खेल विकासमा पनि सहयोगी बनेको छ।