युरोपेली विश्वकप छनोट : एमबापेको गोलमा फ्रान्सको विजयी सुरुआत

काठमाण्डौं, २१ भदौ । केयलिन एमबापेको अन्तिमतिर गरिएको उत्कृष्ट गोलको मद्दतले फ्रान्सले युक्रेनलाई २–० ले पराजित गर्दै युरोपेली विश्वकप छनोटमा विजयी सुरुआत गरेको छ ।

शनिबार भएको समूह ‘डी’ को खेलमा फ्रान्सले पहिलो गोल मिचेल ओलिसमार्फत् गरेको थियो । त्यसपछि ८३ औँ मिनेटमा एमबापेले दोस्रो गोल गर्दै टोलीको जित सुनिश्चित गरे । यससँगै उनले फ्रान्सका लागि थिएरी हेनरीले बनाएको ५३ गोलको कीर्तिमान बराबरी गरेका छन् । फ्रान्सका लागि सबैभन्दा बढी गोल गर्ने खेलाडी ओलिभर गिरोड हुन् ।

यसै समूहको अर्को खेलमा आइसल्यान्डले अजरबैजानलाई ५–० को फराकिलो अन्तरले पराजित गर्‍यो ।

समूह ‘सी’ मा ग्रिसले बेलारुसलाई ५–१ ले हरायो भने डेनमार्क र स्टकल्यान्डबीचको खेल गोलरहित बराबरीमा सकियो । यस्तै समूह ‘बी’ मा स्विटजरल्यान्डले कोसोभोमाथि ४–० को जित निकालेको छ भने स्लोभानिया र स्विडेनबीचको खेल २–२ को बराबरीमा टुंगिएको छ ।