नेताहरू काठमाडौँ आइपुग्न नसकेपछी एमाले सचिवालय बैठक स्थगित

काठमाडौं । लगातारको वर्षाका कारण नेपाल कम्युनिष्ट पार्टी (एमाले) को सचिवालय बैठक स्थगित भएको छ। पार्टी केन्द्रीय कार्यालयका सचिव डा. भीष्म अधिकारीका अनुसार, असोज १९ गतेका लागि तय गरिएको बैठक अब असोज २४ गते बिहान ११ बजे बस्ने गरी सारिएको हो।

डा. अधिकारीले जानकारी दिँदै भने, “अविरल वर्षाका कारण देशका विभिन्न भागमा आवागमनमा समस्या देखिएको र केही नेताहरू काठमाडौँ आइपुग्न नसकेकाले बैठक स्थगित गरिएको हो। बैठक पूर्वनिर्धारित स्थानमै अर्थात् च्यासलस्थित पार्टी केन्द्रीय कार्यालयमै बस्नेछ।”

पार्टीका अनुसार स्थगित बैठकमा पछिल्लो राजनीतिक परिस्थिति, विशेषगरी जेन–जी आन्दोलनपछि उत्पन्न परिवेश, त्यसको प्रभाव र पार्टीको आगामी रणनीतिबारे विस्तृत छलफल गरिनेछ। साथै पार्टी संगठन सुदृढीकरण, सदस्यता नवीकरण, आन्तरिक नीति–कार्यक्रम र स्थानीय तहका संगठनगत तयारीका विषय पनि बैठकको एजेन्डामा समावेश हुने बताइएको छ।

यसअघि एमालेले जेन–जी आन्दोलनपछि उत्पन्न घटनाक्रमबारे गम्भीर समीक्षा गर्ने र युवा पुस्तासँग संवाद प्रवर्धन गर्ने तयारी गरिरहेको संकेत दिएको थियो। पार्टी स्रोतका अनुसार, बैठकमा उक्त विषयमा विशेष कार्ययोजना प्रस्तुत हुने सम्भावना पनि छ।

अविरल वर्षाका कारण राजधानीसहित देशका विभिन्न भागमा जनजीवन प्रभावित बनेको छ। त्यही कारण एमाले सचिवालय बैठक स्थगित हुनु राजनीतिक वृत्तमा स्वाभाविक मानिएको छ।