तेस्रो परा-हिमालय सञ्चार तथा सामाजिक विकास संगोष्ठी सम्पन्न

काठमाडौँ, कात्तिक २३ गते । दुईदिने तेस्रो परा–हिमालय सञ्चार तथा सामाजिक विकास संगोष्ठी शनिबार काठमाडौंमा सम्पन्न भएको छ । संगोष्ठीमा सञ्चार, डिजिटल शासन, सामाजिक विकास र हिमालय क्षेत्रका देशहरूबीचको आपसी सहकार्यका विषयमा व्यापक छलफल भएको छ ।

त्रिभुवन विश्वविद्यालयको पत्रकारिता केन्द्रीय विभाग, कीर्तिपुरमा सम्पन्न सो संगोष्ठीमा नेपालसहित अमेरिका, चीन, भारत, भुटान, बंगलादेश, श्रीलंका र जापानका विद्वान्, अनुसन्धानकर्ता तथा सञ्चार विज्ञहरूको उल्लेखनीय सहभागिता रहेको थियो । साथै देश–विदेशका विश्वविद्यालयका विद्यार्थीहरूले पनि सक्रिय उपस्थिति जनाएका थिए ।

संगोष्ठीमा सञ्चार माध्यमको रूपान्तरण, एआईको प्रभाव, डिजिटल मिडियाको भविष्य, क्षेत्रीय सहकार्यका सम्भावना, पहाडी क्षेत्रमा लैङ्गिक समानता, र विकास नीतिहरूको प्रभावकारिताजस्ता विषयमा ४० भन्दा बढी अनुसन्धानपत्र प्रस्तुत गरिएको थियो ।

त्रिभुवन विश्वविद्यालयका रेक्टर प्रा. खड्क केसी र उपकुलपति प्रा. दीपक अर्यालले सम्मेलनको उद्घाटन सत्रमा सम्बोधन गर्दै परा–हिमालय क्षेत्रका देशबीच साझा चुनौती र अवसरहरूमा अनुसन्धानात्मक सहकार्य आवश्यक रहेको धारणा व्यक्त गर्नुभयो । उहाँहरूले हिमालय क्षेत्रको संवेदनशील भूराजनीतिक, वातावरणीय र सामाजिक सन्दर्भमा सञ्चारको भूमिका अझ सशक्त बनाउनुपर्नेमा जोड दिनुभयो ।

कार्यक्रममा चीनको युनिभर्सिटी अफ इलेक्ट्रोनिक साइन्स एन्ड टेक्नोलोजी अफ चाइना (UESTC) का प्रतिनिधि, भारतका जवाहरलाल नेहरू विश्वविद्यालय, पञ्जाब विश्वविद्यालय, कुमाउ विश्वविद्यालय, र श्रीलंकाका युनिभर्सिटी अफ कोलम्बोका प्राध्यापकहरूले पनि कार्यपत्र प्रस्तुत गरेका थिए ।

संगोष्ठीको संयुक्त आयोजन त्रिवि पत्रकारिता केन्द्रीय विभाग र युइएसटीसीको स्कुल अफ पब्लिक एडमिनिस्ट्रेसनले गरेको थियो । सो अवसरमा ‘रिसर्च सेन्टर फर डिजिटल एण्ड इन्टेलिजेन्स गभर्नेन्स इन पान–हिमालय रिजन’ स्थापनाको घोषणा पनि गरिएको थियो, जसले भविष्यमा क्षेत्रीय नीति, सञ्चार र प्रविधि सम्बन्धी अनुसन्धानलाई प्रवर्द्धन गर्ने जनाएको छ ।