जनकपुरधाम, ३० कात्तिकः ‘सर्पको महत्व बुझौँ, सहअस्तित्वलाई सम्मान गरौँ, संरक्षणमार्फत भविष्य सुरक्षित गरौँ’ मूल नारासहित सर्प महोत्सव सुरु भएको छ ।
मिथिला बिहारी नगरपालिका–२ कल्चर भिलेजमा तेस्रो संस्करणको सर्प महोत्सव आजदेखि सुरु भएको हो । मिथिला वाइल्ड लाइफ ट्रष्ट र सेभ द लाइभ्सको संयुक्त आयोजनामा आयोजना गरिएको सो महोत्सव दुई दिनसम्म चल्ने छ । सर्प र मानवबीचको सहअस्तित्व, जैविक विविधता संरक्षण, र पर्यावरणीय सन्तुलनमा सर्पको भूमिकामा केन्द्रित छ ।
आयोजक संस्थाका अध्यक्ष देवनारायण मण्डलले सर्पको महत्वबारे नागरिकमा चेतना फैलाउने उद्देश्यले महोत्सव आयोजना गरिएको बताउनुभयो । उहाँले सर्पलाई अझै पनि अन्धविश्वास र डरको प्रतीकका रूपमा लिने गरेको बताउँदै यो वातावरणका लागि महत्वपूर्ण भएको बताउनुभयो ।
महोत्सवमा सर्पको जीवनचक्र, विषका प्रकार, सर्पदंशपछिको उपचार प्रक्रिया र उद्धारसम्बन्धी व्यावहारिक जानकारी दिने व्यवस्था गरिएको छ । सर्प संरक्षणसम्बन्धी चित्र प्रदर्शनी र जीवित सर्प प्रदर्शनीमार्फत सहभागीलाई प्रत्यक्ष अवलोकन र सिकाइको अवसर प्रदान गरिएको छ ।
अध्यक्ष मण्डलले महोत्सवको उद्देश्यबारे जानकारी दिँदै सर्प र मानवबीच द्वन्द्व न्यूनीकरण गर्दै यसको पर्यावरणीय, चिकित्सकीय, धार्मिक तथा सांस्कृतिक महत्व उजागर गर्नु महोत्सवको मुख्य लक्ष्य भएको बताउनुभयो । स्थानीय नागरिक र पर्यावरणविद्हरूले महोत्सवको सराहना गर्दै सर्प संरक्षण र जैविक विविधता संरक्षण, जनचेतना फैलाउने माध्यमका रूपमा महत्वपूर्ण हुने आशा व्यक्त गरेका छन् । रासस
युग खबर
२०८२ कार्तिक ३०, आइतबार
प्रतिक्रिया