रानीकोट गढीको उत्खनन र संरक्षण गर्न मुख्यमन्त्री थापामगरको ध्यानाकर्षण

भक्तपुर, २८ कात्तिकः बागमती प्रदेशका मुख्यमन्त्री किरण थापामगरले नौ वर्षदेखि रोकिएको रानीकोट गढीको पुरातात्विक उत्खनन पुनः सुरु गरी संरक्षण र पुनःनिर्माण गर्न पुरातत्व विभागको ध्यानाकर्षण गराउनुभएको छ ।

भक्तपुरको सूर्यविनायक नगरपालिका–७ र ८ मा रहेको रानीकोट गढी तथा घ्याम्पेडाँडा–रानीकोट सडकखण्डको अनुगमनका क्रममा उहाँले ऐतिहासिक सम्पदाको संरक्षणमा प्रदेश सरकारले सहयोग गर्ने बताउनुभयो ।

पुरातत्व विभागले विसं २०७४ मङ्सिर १० देखि १६ गतेसम्म गरेको प्रारम्भिक उत्खननका क्रममा मल्लकालीन दरबारका अवशेष, इँट्टा र झिँगटी फेला पारेको थियो । थप उत्खनन गर्ने भन्दै रोकिएको काम नौ वर्ष बितिसक्दा पनि पुनः सुरु हुन सकेको छैन ।

मुख्यमन्त्री थापामगरले रानीकोट गढी उपत्यकाको प्राचीन बस्ती, सुरक्षा व्यवस्था र ऐतिहासिक राजनीतिक गतिविधिसँग जोडिएको महत्त्वपूर्ण सम्पदा भएकाले थप अध्ययन, उत्खनन र संरक्षण आवश्यक रहेको बताउनुभयो । उहाँले गढीको पुनःनिर्माणमा प्रदेश सरकारले आवश्यक सहयोग गर्ने प्रतिबद्धता व्यक्त गर्नुभयो ।

उहाँले रानीकोट हुँदै काभ्रेपलाञ्चोकको पनौती जोड्ने छोटो सडकको भक्तपुर खण्ड घ्याम्पेडाँडा–रानीकोट सडक वर्षाका कारण जीर्ण बनेको उल्लेख गर्दै स्तरोन्नतिका लागि पहल र सम्बन्धित निकायबीच समन्वय गरिने बताउनुभयो ।

अनुगमनका क्रममा स्थानीय पर्यटन व्यवसायी एवं होटल हाइल्याण्ड रिसोर्टका सञ्चालक रामसुन्दर बकेँले सडकको जीर्ण अवस्थाले पर्यटकको आवागमनमा असर परेको जानकारी गराउनुभयो । उहाँले रानीकोट गढीको उत्खनन, संरक्षण र पर्यटकीय गन्तव्यका रूपमा विकास गर्न तीनै तहका सरकारले ध्यान दिनुपर्ने बताउनुभयो ।

सूर्यविनायक नगरपालिका–८ का वडाध्यक्ष पुष्पराज बस्नेतले घ्याम्पेडाँडा–रानीकोट सडक स्तरोन्नति गरी क्षेत्रलाई प्रमुख पर्यटकीय गन्तव्यका रूपमा विकास गर्नुपर्नेमा जोड दिनुभयो । उहाँले उक्त सडकबाट दैनिक सयौँ सवारीसाधन आवतजावत गर्ने र काभ्रेपलाञ्चोकतर्फ सडक स्तरोन्नतिको काम भइरहेको जानकारी दिनुभयो । रासस