एनपीएल प्लेअफमा पुग्ने चार टोलीको टुङ्गो, विराटनगर समूह चरणबाटै बाहिरियो

काठमाडौं । तेस्रो संस्करणको नेपाल प्रिमियर लिग (एनपीएल) अन्तर्गत प्लेअफ खेल्ने चारै टोलीको टुङ्गो लागेको छ।

कीर्तिपुरस्थित त्रिवि क्रिकेट मैदानमा भएको खेलमा साविक विजेता लुम्बिनी लायन्ससँग ४ विकेटले पराजित हुँदै विराटनगर किंग्स प्रतियोगिताको प्लेअफ दौडबाट बाहिरिएको छ।

विराटनगरले प्रस्तुत गरेको १६७ रनको लक्ष्य लुम्बिनीले १९.५ ओभरमा ६ विकेट गुमाउँदै भेट्टायो। लुम्बिनीको जितका लागि ओपनरद्वय डार्सी सर्ट र आसिफ शेखले समान ४५–४५ रनको महत्वपूर्ण योगदान दिए। यसैगरी अली शेखले २७ र सन्दीप जोराले नटआउट २५ रन बनाए भने अन्त्यमा रुवेन ट्रम्पलमानले छक्का प्रहार गर्दै टोलीको जित सुनिश्चित गरेका थिए। बलिङतर्फ विराटनगरका अपराजित पौडेलले दुई तथा चरिथ असलंका र रुपेश सिंहले एक–एक विकेट हात पारे।

यसअघि टस हारेर पहिले ब्याटिङको निम्ता पाएको विराटनगरले निर्धारित २० ओभरमा ४ विकेटको क्षतिमा १६६ रनको योगफल तयार पारेको थियो। विराटनगरका लागि चरिथ असलंकाले ४३ बलमा ६ छक्का र १ चौकाको मद्दतले ६४ रनको उत्कृष्ट अर्धशतकीय पारी खेले। साथै, शुभम रन्जानेले अविजित ३१, इमरान शेखले २४ र लोकेश बमले १५ रन जोडे। बलिङतर्फ लुम्बिनीका किशोर महतोले दुई तथा अभिषेक गौतम र रुवेन ट्रम्पलमानले एक–एक विकेट लिए।

यस खेलको नतिसँगै एनपीएलको तेस्रो संस्करणमा प्लेअफ खेल्ने चार टोलीहरूको टुङ्गो लागेको छ। लुम्बिनी लायन्स, सुदूरपश्चिम रोयल्स, काठमान्डु गोर्खाज र चितवन राइनोजले प्लेअफमा स्थान सुरक्षित गरेका छन् भने पोखरा एभेन्जर्स, कर्णाली याक्स, जनकपुर बोल्ट्स र विराटनगर किंग्सको यात्रा समूह चरणबाटै समाप्त भएको छ।