निर्वाचनबारे ढुक्क हुन प्रधानमन्त्री कार्कीको आग्रह, ‘तोकिएकै मितिमा हुन्छ’

काठमाडौँ । प्रधानमन्त्री सुशीला कार्कीले तोकिएकै मितिमा प्रतिनिधिसभा निर्वाचन हुनेमा ढुक्क र निश्चिन्त रहन सबैलाई आग्रह गर्नुभएको छ । बिहीबार भक्तपुरस्थित जनक शिक्षा सामग्री केन्द्रमा मतपत्र छपाइको अनुगमनपछि सञ्चारकर्मीसँग कुरा गर्दै प्रधानमन्त्री कार्कीले निर्वाचन प्रक्रिया निर्धारित कार्यतालिकाअनुसार अघि बढिरहेको बताउनुभयो ।

प्रधानमन्त्री कार्कीले निर्वाचन एकै चरणमा सम्पन्न हुने स्पष्ट पार्दै यस विषयमा कुनै अन्योलमा नपर्न आग्रह गर्नुभयो । निर्वाचनको दिन देशका सबै भूगोलमा मौसम अनुकूल रहने विश्वास व्यक्त गर्दै उहाँले सबै मतदाताले कुनै अवरोधबिनै आफ्नो मताधिकार प्रयोग गर्न पाउने बताउनुभयो ।

उहाँका अनुसार निर्वाचन सम्पन्न भएपछि निर्वाचित प्रतिनिधिसभालाई सरकारको जिम्मेवारी हस्तान्तरण गरी वर्तमान सरकार घर फर्किनेछ । यसले लोकतान्त्रिक अभ्यासलाई अझ सुदृढ बनाउने उहाँको भनाइ छ ।

प्रधानमन्त्री कार्कीले भन्नुभयो,
‘ढुक्क र निश्चिन्त हुनुस् । एकैदिनमा हुन्छ चुनाव । दुई चोटि हुनेवाला छैन । तोकिएकै मितिमा हुन्छ । मलाई लाग्छ मौसम पनि राम्रो हुनेछ । हामी सबैले मतदान गर्न पाउनुहुनेछ । निर्वाचित प्रतिनिधि सभालाई सरकार हस्तान्तरण गर्छौँ र आफ्नो घर जान्छौँ ।’

प्रधानमन्त्री कार्कीले निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न निर्वाचन आयोग तथा आयुक्तहरूको भूमिका प्रशंसनीय रहेको उल्लेख गर्दै धन्यवाद व्यक्त गर्नुभयो । उहाँले सबै सरोकारवालालाई निर्वाचनलाई सफल बनाउन सहयोग गर्न आग्रह समेत गर्नुभयो ।