सर्लाही । बहुजन एकता पार्टीका वरिष्ठ नेता राजाराम पासवान नेपाली कांग्रेसमा प्रवेश गरेका छन्। पासवानसहित सयौँ नेता तथा कार्यकर्ताले कांग्रेस रोजेका हुन्।
सर्लाही–४ अन्तर्गत धनकोल गाउँपालिकामा आयोजित विशेष कार्यक्रममा उनीहरूलाई कांग्रेस सभापति गगनकुमार थापाले पार्टीमा स्वागत गरेका थिए। कार्यक्रममा बोल्दै थापाले लोकतान्त्रिक मूल्य–मान्यताको संरक्षण र समावेशी विकासका लागि कांग्रेस प्रतिबद्ध रहेको उल्लेख गरे।
राजाराम पासवानले देशको वर्तमान राजनीतिक परिस्थितिमा स्थिरता र विकासका लागि कांग्रेस नै उपयुक्त विकल्प भएको भन्दै पार्टी प्रवेश गरेको बताए। उनले सर्लाही क्षेत्रको विकास, सामाजिक न्याय र समावेशी प्रतिनिधित्वका मुद्दामा आफू सक्रिय रहने प्रतिबद्धता जनाए।
निर्वाचनको केही दिनअघि भएको यो प्रवेशलाई सर्लाही–४ को राजनीतिक समीकरणमा महत्वपूर्ण मानिएको छ। सो क्षेत्रमा सभापति थापा स्वयं उम्मेदवार रहेका कारण पासवानको प्रवेशले कांग्रेसको आधार थप मजबुत भएको विश्लेषण गरिएको छ।
निर्वाचन नजिकिँदै जाँदा विभिन्न दलबीच प्रवेश–निर्गमनको क्रम तीव्र बनेको छ, जसले स्थानीय स्तरमा प्रतिस्पर्धा थप रोचक बन्ने संकेत दिएको छ।
प्रतिक्रिया