प्रधानमन्त्री कार्की र यूएईका राष्ट्रपति शेखबीच टेलिफोन संवाद

काठमाण्डाै । प्रधानमन्त्री सुशीला कार्की र संयुक्त अरब इमिरेट्स (यूएई) का राष्ट्रपति शेख मोहमद बिन जायद अल नाह्यानबीच टेलिफोन कुराकानी भएको छ ।

प्रधानमन्त्री कार्कीले यूएई लक्षित आक्रमणका घटनाको निन्दा गर्दै यूएईलाई नेपालको तर्फबाट ऐक्यबद्धता व्यक्त गर्नुभयो । उहाँले विषम परिस्थितिमा सम्बन्धित सबै पक्षलाई अधिकतम संयमता अपनाउन, तनाव नबढाउन र नागरिकको सुरक्षा सुनिश्चित गर्न आग्रह गर्नुभएको प्रधानमन्त्रीको सचिवालयले जनाएको छ ।

प्रधानमन्त्री कार्कीले कूटनीति र संवादका माध्यमबाट मात्र दिगो शान्ति सम्भव हुने बताउनुभयो । पश्चिम एशियाको परिस्थिति यथाशीघ्र सामान्य अवस्थामा फर्कने विश्वास उहाँले व्यक्त गर्नुभयो ।

प्रधानमन्त्री कार्कीले त्यहाँ रहेका नेपाली नागरिकसहित सबै बासिन्दा, आगन्तुक र ‘ट्रान्जिट’ मा रहेकाको समान रूपमा हेरविचार गरेकामा यूएई सरकारप्रति आभार व्यक्त गर्नुभयो ।

प्रधानमन्त्रीले गएको फागुन १७ गते ज्यान गुमाएका एक जना नेपाली नागरिकका साथै फागुन २१ गते दुई जना नेपाली नागरिक घाइते भएको जानकारी प्राप्त भएकोमा चिन्ता व्यक्त गर्नुभएको सचिवालयले जनाएको छ ।

यूएईका राष्ट्रपतिले नेपालीको सुरक्षाका लागि हरसम्भव प्रयत्न गर्न आफू तत्पर रहेको बताउनुभयो । केही नेपाली स्वदेश फर्कन चाहेको आफूले जानकारी पाएको उल्लेख गर्दै यूएईका राष्ट्रपतिले परिस्थिति सहज भएपछि सबै किसिमको सहयोग उपलब्ध गराइने जानकारी गराउनुभएको छ ।