उपराष्ट्रपति यादवसँग प्रदेश प्रमुखको संयुक्त भेटवार्ता

काठमाडौं । रामसहायप्रसाद यादव सँग विभिन्न प्रदेशका प्रमुखहरूले शिष्टाचार भेट गरेका छन्। लैनचौरस्थित उपराष्ट्रपतिको कार्यालयमा भएको भेटमा कोसी प्रदेश प्रमुख पर्शुराम खापुङ, बागमती प्रदेश प्रमुख दीपकप्रसाद देवकोटा तथा सुदूरपश्चिम प्रदेश प्रमुख नजिर मियाँ सहभागी भएका थिए।

भेटका क्रममा उपराष्ट्रपति यादव र प्रदेश प्रमुखहरूबीच आपसी शुभकामना आदान–प्रदान भएको थियो। साथै मुलुकको वर्तमान राजनीतिक अवस्था, प्रशासनिक समन्वय तथा संघीय संरचनाअन्तर्गत प्रदेशहरूको भूमिकाबारे पनि छलफल भएको जनाइएको छ।

छलफलमा संघ र प्रदेशबीच सहकार्य, विकासका प्राथमिकता तथा सेवा प्रवाहलाई प्रभावकारी बनाउने विषयमा विचार आदान–प्रदान भएको थियो। प्रदेश प्रमुखहरूले आफ्नो–आफ्नो प्रदेशका गतिविधि र चुनौतीबारे जानकारी गराएका थिए।

उपराष्ट्रपति यादवले संघीय शासन प्रणालीलाई सुदृढ बनाउन सबै तहबीच सहकार्य आवश्यक रहेको उल्लेख गर्दै समन्वयात्मक ढंगले काम गर्न आग्रह गरेका छन्।